كود سبور//
سالا المنتخب الوطني المعسكر ديالو التدريبي فالمغرب، استعدادا لمواجهة تنزانيا ضمن إقصائيات مونديال 2026، وغيكمل التداريب فدار السلام.
ودار المنتخب الوطني المغربي اليوم الخميس فالعشية، آخر حصة تدريبية فمركز محمد السادس بالمعمورة، قبل السفر إلى تنزانيا، وعرفت الحصة التدريبية حضور كاع اللاعبين بما فيهم نايف أكرد اللي وصل للمعسكر البارح الاربعاء حيث كان توعت الويكاند الماضي مع ويستهام وما قدرش يجي من اول التجمع الإعدادي للأسود.
الحصة التدريبية دازت فأجواء زوينة وحماسية، وركز خلالها الناخب الوطني وليد الركراكي والطاقم ديالو مع اللاعبين، على رفع اللياقة البدنية، وعلى الأسلوب اللي باغيين يلعبو به ضد المنتخب التنزاني، وكان التركي طالع وفنفس الوقت روح الدعابة حاضرة.
وغيسافر المنتخب الوطني المغربي غدا الجمعة من المغرب إلى تنزانيا، عبر طائرة خاصة فرحلة مباشرة من مطار الرباط سلا نحو العاصمة التنزانية دار السلام.
Laisser un commentaire