كود الرباط//
قرار غريب وعجيب وميمكنش الا يتصنف ضمن أحكام ما قبل التاريخ وما قبل حتى العصور الحجرية والظلامية، القرار رقم 27 الصادر بتاريخ 17 يناير 2023، لي تسرب دبا فسياق النقاش حول مدونة الأسرة، فيه بلي خاص المرا الحاضنة متخرجش من الدار مور 6 ديال العشية ومخصهاش تهضر مع رجال فواتساب.
القصة بدات فاش قضت المحكمة الإبتدائية بأكادير بتطليق “طلاق شقاق” ونزع الحضانة عن إمرأة لصالح طليقها، لأنها لبست لباسا عصريا و خرجت على الساعة السادسة مساءا وكيتهمها راجلها بالفساد.
الزوج بغا يطلق المرا وقال بلي اكتشف خيانتها حيثاش لبست لباس عصري وتلاقت شي راجل كتعرفو وقالت ليه فواتساب عجبتني الريحة لي درتي وبغيتك تجيب لي بحالها، هادشي موثق بالكاميرات زعما حسب محاضر الشرطة.
مور قرار الابتدائية، المرا دارت الاستئناف، وفعلات حكمات الاستئنافية لصالحها في الحضانة، ولكن الزوج ماوقفش هنا ومشا للنقض.
محكمة النقض بطلت القرار ديال محكمة الاستئناف ورجعات الملف للمحكمة من جديد، بل اعتبرت محكمة النقض بلي خروج المرا فالساعة السادسة مساء بلباس عصري وكتبادل رسائل قصيرة فالواتساب مع شي رجل اخر، هي أفعال تقدح في المروءة والعفة الواجب توافرها في الحاضنة.
ها القرار (وثائق):
Laisser un commentaire