أبو عبيدة ديال التعليم.. كيفاش العدل والاحسان وشي متطرفين ركبو على احتجاجات الاساتذة وردو الدولة بحال العدو الاسرائيلي بالنسبة لحماس: وصفو مسؤولي وزارة بنموسى بالحثالة وبلي أباء وأولوياء التلاميذ غايلحقهم العار والخزي

احمد الطيب كود الرباط//

فيديو خطير منسوب لأبوعبيدة ديال المغرب نسبة الى الناطق العسكري لحركة حماس، فيديو فيه فتنة كبيرة ضد مسؤولي وزارة التربية الوطنية وللأسر المغربية لي ضد اضراب الأساتذة، فيه مقارنة عجيبة بين الدولة والمغربية وإسرائيل.

دبا المغرب ردوه بحال الاحتلال وكيان خصو يتحارب ويجاهدو فيه، كما كتشوفو حركة حماس، فالفيديو كيبان شخص كيهضر بلغة اسلاموية تحريضية، كيوصف فيه مسؤولي وزارة التربية الوطنية بالحثالة وانه غادي ينالو الخزي والعار كذلك بالنسبة للاسرة المغربية لي خرجات تحتج ضد استمرار اضرابات الاساتذة.
هاد ابو عبيدة اللي كيهضر باسم الاساتذة، دار راسو ناطق رسمي باسمهم ومعندوش الجرأة يبين راسو وجبان، مخبي كأنه مطلوب من الامن او غادي يصفيوها ليه كيف كدير إسرائيل لقادة حركة حماس.
هاد التشبيه خطير جدا، كيفاش هاد الاحتجاجات لحدود اللحظة ماشي ممنوعة والامن كيحميها، كينوضو هادو كيصورو البلاد بحال يلا كيسيرها جيش اسرائيل وخاص يتحاربو معه الاساتذة (بحال المقاومة ديال حماس).

الخطير كذلك، هو ان هاد ابوعبيدة كيهدد الوزير شكيب بنموسى، وكيقوليه نحن في انتظارك لنضيقك اصنافا جديدة من المظاهرات.

الغريب فهاد الحملة اللي انطلق بفيديوهات واستغلال احيانا للاطفال فهاد الاحتجاجات (تكتوك)، كلها تحريض وضرب في قيم الاحتجاج والعمل النضالي لي كيكون عندو منطق واخلاق، ماشي بالتخوين ومحاولة تشبيه مسؤولي قطاع التعليم بجيش الاحتلال الاسرائيلي.

كما ان العدل والاحسان دخلت على الخط، وتبنات هاد الاحتجاجات خصوصا فالشمال، بحيث وصف حسن بناجح هاد الاحتجاجات بالقول :”مشهد مهيب من مسيرة الأساتذة اليوم من مدينة تطوان..مشهد بهذه القوة لا يمكن إلا لأصحاب حق عادل أصيل”.
فهاد الاحتجاجات خلطو بين مطالب الاساتذة والحرب في غزة. الاسلاميين كيستغلو كولشي باش يصيفطو مساجات للدولة.

إقرأ الخبر من مصدره