كود ///
ممثلو الشعب المغربي فالبرلمان خلاو الغلاء والازمة والتضخم والمس بالقدرة الشرائية للمواطن والبطالة وما بان ليهم غير علاش الرابور طوطو
خلاو كلشي مشاكل المغرب الانية وتوجهو سؤال لوزير الثقافة على حفلة “طوطو”.
علاش هاد الشي؟ لان طوطو قال “كدري مغربي مقودة عليه بادي الراب” وباللي “الوزارة =الثقافة والشباب= دارو خدمتهم مقودة” وقبلها قال فندوة صحافية راه كيكمي وقال كلام اخر كيقولو اي رابور. اغانيه فيها كلمات كتبان لشي وحدين قاصحة وكتبان لجمهورو صادقة.
فنان الراب كلامو خضر ما عندوش مع الزواق والتنماق. كاين غير كود ونيشان. هادا هو الراب. هاكدا بدا فميريكان. فن المهمشين. ناس التحت. عادي جدا ان حكومة بتوجهها الحالي تدعم هاد الفن. عادي جدا ان وزارة الثقافة والشباب والاتصال باش حتافلات بالرباط عاصمة الثقافة الافريقية جابت مغربي كيعشقوه الملايين وعندو جمهور واسع. فنان ما عندو قضايا تحرش ولا اغتصاب بحال سعد لمجرد.
دابا هاد السياسيين ديال جوج دريال ما قدروش يطرحو سؤال واحد على ما نشر عن حالات تحرش واغتصاب اتهم فيها فنان مغربي. هاد الشي خطير. ولكن باغيين يسولو فالبرلمان علي كلمات كيظلو يسمعوهم يوميا. هاد الشي اسمو النفاق وعدم الاهتمام بالشأن العام للمغاربة.
مغني فنان جا قدم سهرة ما شفرش المال العام ما تلاعبش بالضرائب ما متهمش بالاغتصاب٬ خليوه يغني الفن اللي بغى. انتوما كتمثلو الشعب المغربي وفهاد السهرة حضرات 170 الف مغربي. اكيد هاداك اللي طرح السؤال وصل للبرلمان ما صوتوش عليه حتى 10 بالمائة من هاد الرقم وكيحل فمو.
هاد السياسيين ديال اخر الزمن يقلبو علي اللي كيهم المواطن ويبعدو على معتقداتو وعلى اذواقو. هادي راها كتبين غير ضحالتكم وصافي