كود هناء ابو علي ///
كاينة فوضى كبيرة ف”دوزيم”. واش كاين وقاحة كثر من هاديك اللي كانت فالادارة حتى ولات مقدمة برنامج منوعات ثم عوضات عماد النتيفي وولات تلميذة مدرستو فكلشي ومن بعد ولات مقدمة برنامج “صباحيات”. كنهدرو على سميرة بلوي. خرجات كتضحك على ادارة القناة اولا ثم على لمغاربة باش كانت جاية ف”لوطوروت” وفخرق للقانون وقفات لالاهم سميرة ودارت لايڤ كتطلب الاعتذار من سفارة المانيا والكذبة اللي قالتها “ما عطاوهاش الفيزا”. اييه شوفو الجبهة فين كتوصل. ماشي الجبهة السيبة كتنفخ فامثالها باش توصل بيهم الوقاحة لهاد الافعال.
اللي بان من بعد ان داك الفيلم ديال فيزا المانيا غير سيناريو تافه. السيدة شاركات فبروكسيل العاصمة البلجيكية بعد يومين اي دخلات فضاء شينگن. نفس الڤيزا ممكن تدخل بيه لالمانيا او فرانسا او بلجيكا او … بمعنى اخر ان ديك الفيلم ديال بغيت نمشي لالمانيا لشي سهرة دايرها شي طبيب لجمع تبرعات للحوز راه طلع سيناريوه مفضوح.
السيدة كانت فبروكسيل لسهرة هي اللي نتجاتها. اييه ولات منتجة. مشات مع انتهازية بحالها اسمها ليلى حديوي وعرضات على وحدين كيخافو منها. هاد الخوف ما جايباهش من حرفيتها فالانتاج ابدا. جايباه من “دوزيم”.
هنا اللي مشكلة كبيرة. هنا علاش قلنا راها تلميذة لعماد النتيفي ودابا راها فاتت الاستاذ اللي علمها هاد الامور اللي القناة عارفاها.
هاد البرنامج ديال “صباحيات” اللي كتقدمو خاصو يتحيد منها وديك الساعة نعرفو واش لا البلوة اللي تبلات بيها القناة منتجة بصاح ولا غير كتخلعهم ب”دوزيم”.
كيفاش ولات القناة “گريمة” و”گميلة” لامثالها. كيفاش القناة ولات بحالها بحال هاديك بوجنوي كارط فيزيت يستقبلوها كمسؤولة كبيرة وهي سيدة علي قد الحال فالتقديم. كيفاش وحدة فالقناة جامعة بين الاشهار لمنتجات كيحضر بعضهم فصباحيات.
علاش القناة الثانية وصلات لهاد النوع من التسيب يخليو امثالها وامثال بوجنوي دايرين ما بغاو.
القناة وصلات لحالة غريبة من التسيب. قناة قادرة تعطي انتاج مزيان كيف كيدير. صحافيوها وصحافياتها =غالبيتهم ماشي كلهم= قادرات وقادرين علي الابداع كيف وقع فتغطية الزلزال وفاحداث اخرى ولو بامكانيات قليلة٬ يعني فيها ناس كيبدعو وفيها امثال سميرة وبوجنوي كيعطيو صورة خايبة على هاد القناة.
امثالها كيدير الاحباط للفئة المجتهدة فالقناة. الامور راها واضحة. شكون كيسافر بزاف. شكون كيربح بزاف بزاف ومنين جاب هاد اللعاقة كلها. راه كلشي باين للعادي والبادي. خاص هاد الشي يوقف. خاص امثالها يتحيد ليهم جميع البرامج ويجيبو وجوه جديدة وما طولش بزاف باش ما يتكرروش امثال النتيفي والبلوي وبوجنوي
Laisser un commentaire