سهام البارودي- كود//
المغرب كايتطور و هادي واحد الحاجة مافيها ادنى خلاف ! الى مشيتي من المغرب مدة عام و رجعتي اكيد غادي تلقى بزاف ديال الحوايج تحسنو، انا بعدا لاحظت بلي غي فمدة قصيرة، تزادو بزاف د الحوايج فالبنية التحتية، طرقان جداد تحلّو، لوطوروت غادة و كاتوسع و الاشغال لي خليتيها واحد العام سالات و بدات اشغال اخرى، محلات تجارية كبيرة و ريسطورات جداد و محلات د الترفيه كثيرة و السوشي فين مامشيتي حتى الترانات لي كانو ماعمرهم كايجيو فالوقت ولاو كايحتارمو الوقت و فيهم البلايص بالأرقام كولا واحد وبلاصتو !
و هادو حوايج زوينين بزاف كايفرحو الانسان على الاقل بعدا فالمدن الكبرى كاتبان الطفرة اما المغرب المنسي هاداك راه الزلزال عرا على الواقع لي فيه ! ولكن المشكل كايبقى مشكل عقليات ! البنية التحتية كاتقدّم والعقليات كاتوخّر ! مظاهر التخونيج تزادت و العيالات مغنبرين وسط الزيوف و شي تهيميج فالافعال و الاخلاق ! بنادم كايطلع للتران واخا عندو الرقم ديالو يقدر يجلس فشي بلاصة اخرى و يبقى مدلّي ودنيه كايساين يجي شي واحد يقوليه نوض راه بلاصتي آ الشريف ! تقدر تجلس فقهوة و تسمع واحد حداك طالق الجينيريك ديال شوف تيفي كايتفرج فكيفاش واحد قتل مرتو و فصل الراس على الكسدة … شي واليدين فهمو التربية الايجابية بالمقلوب ولاو غا طالقين ولادهم لي بغاوها يديروها كايقربو يطلعو ليهم فوق راسهم و يخراو، كاتلاقاهم فلوطيل فالريسطو فالطاكسي فين مامشيتي، العشوائية فالاسواق و الجوطيات و مالين الكرارص تزادو، مالين الجيلي مازال كايدورو فالشوارع و كايمدو يديهم ليك ” ختي خلصيني خاصني نمشي” ! السعاية فالفوروجات و الدراري الصغار لي كايمسحو الجاج … گاع هاد مظاهر الفقر و الجهل تزادت و تفرگعات !
داك المد الهمجي كاتحس بيه تزاد بزّاف، وسط منو واحد الشوية د المغاربة لي كايتقاتلو باش يعيشو بحرية و بسلام وسط اجواء ديال الفرح و الحب ! واخا كايعياو يعزلو راسهم على الغوغاء كاتجي شي ظروف و كاتلاقيك بيهم فشي فوروج و لا شي مقاطعة و لا باب شي مدرسة !
هادشي كايخلق ديكالاج بين البنية التحتية و البنية الفوقية د المغرب ! الزواق و التصاور و المهرجانات داكشي لعلك ترضى ! كانطيرو فيه الصراحة و غادين فيه مزيان و لكن اوفون ! فاش كاتغرّق لداخل كاتلقى بزاف ديال الخدمة خاصها تكون على العقليات و لي كانظن غاتجي مع الوقت ! و غايفرضها التاريخ بزز واحد الوقت.