الترانات فالمغرب من غير البراق خاصهم كاملين يتباعو لشي مول لافيراي جملة ! كيفاش تران ديال دولة غاتنظّم كاس العالم و كايربط بين مدن كبيرة فحال كازا و مراكش و لا فاس غير مجهّز باش يطلعو فيه الناس ذوي الاحتياجات الخاصّة بكرارسهم و الناس الكبار بعكاكزهم و الرضع لي خاصهم فين يبدلو ليكوش !

سهام البارودي- كود//

تخايل انك تشد التران أطلس الرابط بين مراكش و كازا و نتا عندك شي رضيع بكرّوستو ! كيفاش غادي دير ليه ؟ كيفاش غادي تطلع الكروسة فالتران من دوك البيبان الضيقين لي فيهم الدروج و فين غاتطوي الكروسة و تحطها و الى داك الرضيع احتاج يبدل لاكوش ديالو فين غاتبدلها ليه و الطواليطات اصلا ماصالحينش حتى للناس الكبار ! تخايل انك تكون من ذوي الاحتياجات الخاصة او الوالد او الوالدة او شي حد قريب ليك محتاج يسافر و عندو كروسة او عكاز كيفاش غايهبط فمحطة لوازيس و يطلع فالدروج و يهبط من الدروج و ماكاين لا اصونصور لا والو !

الترانات د المغرب كاملين من غير البراق بوحدو مامجهزينش لاستقبال الرضع وذوي الاحتياجات الخاصة و الناس الكبار،يا الله يا الله يهزو واحد بصحتو و شوف تشوف ! نتا بصحتك و لاحتاجيتي الطواليط شوف واش تلقاها نقية و لا خانزة بريحة البول !

هادشي راه مهم بزّاف لاكنا غانظمو كاس العالم، الولوجيات شي حاجة كاتدل على كيفاش الدولة كاتخمم للمواطنين ديالها قبل مانهضرو على السياح ! الصغير و الكبير و الصحيح و المريض ماشي دوك الترانات هاكاك دايرين فحالا مشاركين فرالي باري داكار ! تركب مصايب شعرك تهبط مشعكك، تطلع بحوايجك نقيين و محددين تهبط بيهم مكمشين ! الجاج مگلگ ! تبغي غا تشوف المناظر الطبيعية مايمكنش ليك بقوة الوسخ و الغبابر مجموعين فالجاج من نهار دخلو دوك الترانات للمغرب ! كلشي مصدّي كلشي موسخ ! والو لونتروتيان ! من نهار دخلو للمغرب ماتصلحو ماتصبغو!

هنا كاتبان العقلية د المغربي اشخاصا و مؤسسات ! كاين شي واحد يخسر ليه روبيني فدارو يخليه خاسر و لا يسدو گاع مايعاودش يقرب ليه ! يبدا يقطر يدير ليه جفاف لتحت و مايجيبش بلومبيي يصلحو ! تخسر ليه غا بولة يخليها طافية شهر و داك البيت فيه الظلام كايضوي عا بالبيل د التيليفون باش مايشريش بولة و يركبها … صدق هادشي حتى فالمؤسسات لي ماكاتهلاش فشنو عندها و ماكاتجددش البارك د الترانات ديالها باش يكون ملائم لهاد الوقت !

إقرأ الخبر من مصدره