گاع الواليدين عندنا متّافقين بلي ربّاو ولادهم أحسن تربية حتى هاديك لي ربّات بنتها غي بالعصا والقمع والنتيف وهاداك لي ماعمرو تسوق لولادو! وشكون كايدير المصايب فالزنقة؟! شكون كايلوح الزبل؟ شكون كايجبد قضيبو ويبول فالشارع العام؟! شكون كايحك مؤخرتو قدام عباد الله؟ ولاد الاخرين ماشي ولادهم! واش بنادم ماربّا تاراسو وبغيتيه يربّي ليك مواطنين صالحين

سهام البارودي – كود//

فاليوتوب كاينين بزاف ديال الواليدين كايديرو ولادهم جرائم بشعة و كاتلقاهم كلهم متافقين انهم ربّاو ولدهم و لا بنتهم احسن تربية ! لي بنتها كاتشمكر و كاتعاطى البوڤا كاتقوليك ربيتها احسن تربية ! لي ولدو مغتاصب و لا سارق و لا قاتل تاهوا كايقوليك ربيناه احسن تربية ! ماخاصو خير !

المغاربة متافقين كاملين انهم ربّاو ولادهم احسن تربية ! و فاش كاتجي كاتشوف فالزنقة كاتلقى مظاهر التهيميج و تاعروبيت طاغية ! عباد الله كاتلوح الزبل فين ماوالاها، بنادم ماعندوش ثقافة الصف و كايبغي يضوبلك فالادارات، حتى صباح الخير و سمح ليا وواش ممكن و شكرا و الله يجازيك بيخير و بارك الله فيك … و هاد العبارات د الصواب بنادم بزاف ماكايعرفش يقولها ! غا كايدرّم كي الحمار فشي ادارة و يحط كمشة د الاوراق للموظف و يگمگم ” بغيت شهادة السكنى” ! والو الأدب و الصواب و التعامل !

كلشي متافق انه ربّى ولدو و لا بنتو احسن تربية و في المقابل الشارع عامر ببنادم كايجبد قضيبو و يبول على شي سور واقف من عهد الموحدين الى طاح غايطيحوه غا البوالة ! بنادم كايحك ترمتو عادي

فالشارع و بزاف د الرجال كايحكو قشاوشهم بلا حشمة بلا حيا ! كاتوقف عليه شي قناة بالكاميرا و الميكرو، كايحك و كايشرح الصحافية ” نعام آختي، خاصهم يسرحو لينا القوادس فهاد الزنقة ” و هوا خدام كايحك قوادسو.

كاين واحد الاجماع خطير على انه گاع الآباء دايرين الدور ديالهم و على أكمل وجه واخا كايشوفو بعينيهم انهم كاينتجو غا الفاشلين و المرضى و الحمّاق و قلالين الترابي و لكن حتى واحد فيهم ماكايرضى يعتارف بلي راه ما تربية ما تا خصية داكشي لي دار ! و بأنه كان غاكايخربق و صافي ! شي أب يقوليك انا راه ماربيت ولادي ماتالعبة اصلا كنت مشغول خدام فين كنت كانشوفهم و لا شي أم شجاعة تقولينا انا بعدا ولادي كنت كانربيهم غا بالعصا و الطرش و العضان فين كان عندي العقل باش نربي و نسمع و نتحاور ؟! والو للأسف ماكايناش الشجاعة كاين غا الكذابين و الكذابات لي كايشوفو بعينيهم انهم كاينتجو الامراض و مازال كايخرجو عينيهم قدام الميكرو د شوف تيڤي باش يقولو ” واخا ولدي لي غتاصبها و لكن راه و الله حتى مربي و درويش آ ختي فاطيمزهرا”

إقرأ الخبر من مصدره