الوداد فايت خسرو 4 الماتشات متابعين فعام واحد وربحو 2 ألقاب.. واش غيعودوها؟

كود سبور//

سبق الوداد الرياضي عاش نفس الوضع الصعب اللي كيدوز منو دابا، بخسارة 4 ماتشات متابعة فعام واحد، ولكن خرج منو الفريق وتوج بطل بجوج ألقاب واحد منها محلي وآخر قاري.

وحسب رشيد البوهالي المتخصص فالأرشيف الرياضي المغربي وبالضبط كرة القدم، فالوداد سبق له وداز مر من نفس الظروف الصعبة اللي كيعيشها حاليا بخسارة 4 ماتشات متابعة، وكان هذا الشي قل أكثر من 21 سنة.

ووضح البوهالي أنه عام 2002 خسرو الوداد 4 دالماتشات  فـ3 مسابقات كان مشارك فيها الفريق بين البطولة الوطنية وكاس العرش وكأس الكؤوس الإفريقية، لكن قدرو الواك مع نهاية العام يخرجو متوجين وأبطال لمسابقة كأس الكؤوس ومسابقة كأس العرش.

وحسب الوثائق اللي كيتوفر عليها رشيد البوهالي، فالوداد الرياضي كان خسر عام 2002، مع حسنية أكادير بواحد لزيرو فالدورة 29 من البطولة الوطنية يوم 2/06/2002، وخسر الفريق مع اولمبيك خريبكة بواحد لزيرو ضمن الدورة 30 من البطولة الوطنية يوم 8/06/2002، وخسر سدس عشر نهائي كاس العرش مع اولمبيك خريبكة يوم 23/08/2002، وخسر ذهاب ربع نهائي كاس الكؤوس الافريقية مع فيتا كلوب الكونغولي يوم 01/09/2022.

رشيد البوهالي وضح أنه ورغم كل هذه الخسارات، فقدر الوداد الرياضي يخرج عام 2002، وهو متوج بجوج ألقاب وهي كأس العرش نسخة 2001 والفينال مع المغرب الفاسي اللي كان مؤجل وتلعب عام 2002 ولقب كأس الكؤوس الممتازة.

وتلقى الوداد الرياضي الخسارة الرابعة له على التوالي البارح السبت مع أسيك ميموزا فدور مجموعات دوري أبطال افريقيا، بعدما خسر الفريق مع الجيش الملكي فالبطولة الاحترافية، وقبل منها مع كلاكسي البوتسواني ضمن دوري أبطال إفريقيا، وقبلها فينال السوبر ليك الإفريقي ضد ماميلودي صن داونز الجنوب إفريقي.

إقرأ الخبر من مصدره