كود كازا ///
دابا كيف دير مع هاد المنسق العام لمهرجان مراكش الدولي للفيلم علي حجي. اليوم قال للصحافة او خرجوه يقول حقاش صعيب على شي حد فهاد المهرجان يهدر بلا ما ياخد الضو الاخضر باستثناء لفرانسيس. قال هاد المنسق باللي الدورة 20 من مهرجان مراكش كانت “نسخة استثنائية على الأصعدة” وطبعا ركب على فوز اسماء المدير بالجائزة الكبرى وعلي الازرق بجائزة لجنة التحكيم وزاد “شهدت بروزا أكثر قوة للسينما المغربية”.
طبعا نسخة استثنائية لمنسق كيربح مزيان وضارب الطم على فضايح لفرانسيس وتدخلاتهم ووقاحتهم واستمرارهم فالتحكم فهاد المهرجان
حجي عطانا غير النظري. كاين غير الانشاء. هدر على ورشات الاطلس وما هدرش على غياب المنسق ديالها مارتن سكورسيز. ما جبدش شكون مكلف بهاد الشي بعد سكورسيز. ديك الهدرة ديال راه “كذب ابيض” للمدير وعصابات” لكمال الازرق استفدات من “ورشات الاطلس”
دابا مهرجان عندو عشرين عام ومازال عندو مدير فني اجنبي بحال ريمي بونوم وخارج المنسق العام كيهدر. كون تحشم. هاد المدير حتى هو دار تصريح باش يدافع على طرف الخبز ديالو. وقال للصحافة “أعتقد حقا أن العاطفة كانت في قلب هذه الدورة من خلال الأفلام، ومن خلال بعض اللقاءات ومن خلال مداخلات المخرجين التي لامست قلوب العديد من رواد المهرجان”.
العاطفة هي اللي خرجات على المغاربة وخلات الاجانب خاصة الفرنسيين يتحكمو فمهرجان. العاطفة اللي خلات الادارات السابقة والحالية =من المغاربة= تدخل فصراعات وتخلي امثال ميليطا توسكان دو بلانتيي تورث هاد الحدث. تتحول من مديرة عامة لمستشارة لرئيس مؤسسة مهرجان مراكش الامير رشيد.
الدورة ما يمكنش توفي لكل وعودها كيف قالو المنظمين والفرانسيس كيصولو ويجولو. تحقيق التقارب بين الشعوب كيكون باش بلادها تخلي الاجانب خدامين عندنا فبلادنا ماشي حنا خدامين عندهم فبلادنا.
هاد الشي كيقتضي تغير هيكلة مؤسسة مهرجان مراكش. يجيبو رئيس جديد ويجريو علي فيصل لعرايشي نائب الرئيس وحتى على ميليتا ومعاها علي حجي هاد المنسق واخا باقي شوية جديد
Laisser un commentaire