الثقافة هي الحل ماشي لا الاسلام ولا الديموقراطية. سعداني رجع الروح للباطوار و”حضن” جذور مربعة باش كلشي توصلو الابداعات الفنية باش يبني عالم فيه احترام العيش المشترك

كود هناء ابو علي //

عادل سعداني ناشط مهم فالثقافة فكازا. ناشط حد الحلم. ما كيعرف لا الاحباط ولا الراحة باش يحقق شعارو اللي كان لابسو فافتتاح “حاضنات” او جذورو المربعة اللي حتاضنها الباطوار ديال كازا هاد الويكاند. الحدث منظماه جمعية “جذور” اللي اسسها وكيشرف عليها سعداني. 

الفاعل الثقافي متماهي مع شعارو الدائم. “الثقافة هي الحل” . الشعار الحلم اللي فالمتناول واللي شرحو فتصريحو ل”اش نيوز” “شي كيقول الاسلام هو الحل وشي كيقول الديموقراطية هي الحل وانا كنقول الثقافة هي الحل”.

كيفاش؟ المغربي خاص يكون عندو حس نقدي. ماشي الريح اللي جات تديه” يشرح سعداني. عالمو الحالم الحقيقي فنفس الوقت هو “فضاء العيش االمشترك” المبني على احترام الاختلاف وتدبيرو. المثقف عندو ماشي اللي قاري الدمياطي. اللا. هو اللي كيحشم يدير شي حاجة خايبة فهاد الفضاء العام المشترك. 

السعداني فحوارو هادا كيشدد٬ بلا ما يقولها حرفيا٬ على ان تقدم المغرب مرتابط بهاد الشعار. وباللي خاص بداية لهاد الشي بمحطة اولى. 

فالنشاط اللي شرفات عليه جمعيتو ورجع فيه الحياة لهاد الفضاء التاريخي فكازا “الباطوار” بالحي المحمدي شرح كثر هاد الشعار. “حاضنات” هي فكرة طبقها من خلال برمجة جمعات من 1 دجنبر حتى 4 منو ولمدة 12 ساعة فاليوم٬ قدم مسرح وموسيقى وسيرك ومعارض للتصوير الفوطوگرافي وتنصيبات فنية…جمع فهاد الاشكال الفنية فئات عمرية مختلفة مع غلبة للشباب. فتح هاد الانشطة لجميع البيضاويين. الدخلة كانت فابور. قاوم واخا كانت شي تخربيق من الادارة النهار الاول عطلات حتى البرمجة. مقاومة “الثقافة هي الحل” باينة.

السعداني ما بقاش مربع يدو حتى يحقق شعارو. بداه ورجع الثقافة والفنون للباطوار بعد اكثر من 8 سنين من الغياب. كيحارب لملء فراغ ثقافي خايب فاكبر مدينة فالمغرب. 

إقرأ الخبر من مصدره