الوالي الزاز -كود- العيون///
[email protected]
تواصل “تنسيقية الشباب الصحراوي ملاك القوارب المعيشية” مرفوقة بالعائلات سلسلة إحتجاجاتها السلمية بمدينة الداخلة، من خلال خوض وقفة جديدة بساحة البريد في حي اكسيكيسات، مساء الجمعة.
وشارك العشرات من ملاك القوارب المعيشية مع عائلاتهم في وقفة سلمية جديدة كيطالبوا فيها بضرورة تحقيق ملفهم القاضي بالإدماج فقطاع الصيد البحري فالداخلة، وكينددوا فيها بسياسية غض الطرف لي كديرها الجهات المختصة معاهم بعدما عطاتهم مجموعة من الوعود فهذا الصدد.
الوقفة السلمية ديال ملاك القوارب المعيشية شهدت رفع شعارات منددة بالتغاضي على ملفهم المطلبي وتخلي المنتخبين ومسؤولي المدينة عليهم وتركهم عُرضة للفقر والتهميش، خاصة وأن الصيد البحري هو مصدر رزقهم وعيشهم الوحيد لي كيعيلو بيه مئات العائلات، مطالبين بضرورة التعاطي الإيجابي مع حراكهم وإنتشالهم من الوضعية الإقتصادية الهشة لي كيعيشوها، متعهدين بمواصلة الإحتجاج السلمي وتصعيدو فالايام الجاية.
هاد الملف ديال القوارب المعيشية خاصو يتحل قبل ما ياخد أبعاد أخرى ويدير مشاكل فجهة الداخلة وادي الذهب، ما يمكنش للجهات المختصة تحصي القوارب وتدخل فحوار معاهم وتقدم ليهم وعود وتعدم مئات القوارب الأخرى هادي عامين تقريبا وفالأخير تخلف وعودها وتلوحهم للشارع.
ملف القوارب المعيشية عندو علاقة مباشرة بإقتصاد الداخلة وبملف الصيد البحري لي كنقولو أن عوائدو تستثمر فتنمية البشر والحجر فالصحرا، ولكن خروج هاد الفئة للشارع كيعطي فرصة لوحدين آخرين يدخلو على الخط، خاصة وأننا على بعد أشهر قليلة من حكم محكمة العدل الأوروبية حول الإتفاقيات التجارية بين المغرب والإتحاد الأوروبي لي كتشمل الصحرا.
Laisser un commentaire