سهام البارودي ـ كود//
گاع المغاربة كايتشكَاو من “التفاهة” والڤيديوات لي كايسمَيوها ظلما وعدوانا “التافهة” فاليوتوب وتيك توك! و فين مامشيتي كاتسمع “ماتشجعوش التفاهة”، “حاربو التفاهة”، “سينياليو التفاهة”! فاش كاتسمع هاد الحرب الخيايلة على التفاهة كاتخايلنا حنا فحال الجابون ولا كوريا الجنوبية بقوّة الانضباط والمعقول!
زعما راه بنادم كون ما هاد “التفاهة” كورّاه كايتفرج غي فالاخبار والروبورطاجات والوثائقيات ديال آرطي والڤيديوات د تبسيط العلوم! آ سيرو من الكذوب ياتا سيرو! كل شعب كايتفرج فداكشي لي كايحس بيه قريب ليه وكايفهم ليه وفيه! وحنا كشعب الڤيديوات لي كانتفرجو فيها راه كاتعبر على الثقافة ديالنا! وهاد النوع د المحتوى راه كاين فالعالم كامل ماشي اختارعوه المغاربة! راه ميريكان يا ميريكان وفيها قنوات مليونية كاتلقى المحتوى ديالها هوا بنادم ناعس والناس حاضياه كاتفرج فيه ناعس! الشينوا القوة الاقتصادية العالمية بالمعقول ديالها والخدمة والرديم والتحوفير والانضباط وفيها قنوات مليونية كاتلقى مولاها الاختصاص ديالو هوا ياكل والناس كايتفرجو فيه وكايستمتعو بالصوت ديال المضيغ والسريط ديالو! واحد كايگدد العظام فالشينوا وواحد كايتفرج فيه من تحت المانطة فسبت گزولة !
العالم كامل فيه هاد النوع د المحتوى لي المغاربة مصرّين يسمّيوه “تافه” وهوا محتوى ترفيهي محترم مّاليه عندهم الشجاعة والقوة والانضباط باش كل نهار يخلقو ليك فيديو ولا لايڤ جديد، واش يصحابك ساهلة تكون رضى ولد الشينيوية ؟! ساهلة تكون أسماء بيوتي وتلقى كل نهار محتوى للقناة ديالك وتصور فيديو ويضرب ليك نص مليون مشاهدة؟! راه خدمة كبيرة وذكاء كبير وفهم خطير لشنو كايبغي شعيبة! واش غير آجي وبكي وعدد فحالي كاتبكي وتعدد مي نعيمة ؟! واش أي واحد يقدر يكون بالحمق والهبال ديال هيام سطار؟! واش ساهلة تكون عندك الترمة ديال سارة العريضة والانضباط ديالها وهي كل أغنية بانت جديدة كاتصور فيديو كاتشطح عليها! طبعا لا! كاين بزاف ديال الناس ماكرهوش يحققو غا النص ديال داكشي لي حققات أسماء بيوتي ولكن حيت ماعندهمش الشجاعة باش يصورو ڤيديو ويخرجو بوجهم فاليوتوب كايحقدو على صحاب اليوتوب !
وكيما كاين الترفيه! كاين محتويات اخرين علميين وثقافيين ولكن فيناهوا المستوى باش بنادم غايتبعهم؟ وأصلا واخا يكون گاع المستوى واش بنادم ماكايبغيش يفوج على راسو شوية؟! راه أطباء ومهندسين ومحامين وكاتلقاهم فان ديال ميمي هي كاتشطح وكاتسبهم الله يعطيكم موصيبا وهوما كايضحكو ليها !
العالم محتاج للترفيه والناس كاتبغي الترفيه وكاتقلب عليه والترفيه راه صناعة قائمة بذاتها كادخل الفلوس والفلوس الصحيحة!
المغربي كايموت على الخبارات والجموع والتبرگيك واخبار المآسي ديال عباد الله وحشمان يعتارف بيها، الڤيديوات ديال التفاهة راه كاضرب ملايين المشاهدات، وماشي الجنون لي كايتفرّجو فيهم، الأغلبية الساحقة د المغاربة لي عندهم تيليفون وكونيكسيون كايتفرجو! فانات وعشاق ديال اليوتوب وتيك توك! ماباغينش يعتارفو بلي هوما مستهلكين كبار ديال ڤيديوات روتيني اليومي وتشالانجات تيك توك والڤلوغات والمقالب ديال نخنوخ ونيبا! بنادم كايبات سهران كايكبس فالتيك توك ويسيفط القلوبة وفالصباح كايغسل وجهو ويكتب “الخوت سينياليو هاد القناة”.
علاش آودي ياك والي باس؟
Laisser un commentaire