النّاس فالنّاس والقرعة فمشيط الراس! في الوقت لي المغاربة مقلقين على مستقبل ولادهم لي ماكايقراوش هاد الأيام! بولحية فرحان حيت قالّيك التلاميذ كايعمرو الجوامع، المغاربة راه بغاو ولادهم يقراو اللغات والأدب والعلوم والفلسفة ويوليو ليهم مهندسين وأطباء وعلماء قاريين! سوّل أي أب مغربي واش يبغي ولدو يكون نورولوگ فالسويسي ولا فقيه مشارط فشي دوّار! ‎

سهام البارودي كود//

واحد بولحية خرج مؤخرا، من الجنب! تاهوا قاليك، يسطل بسطله، في موضوع إضرابات الأساتذة وطبعا فحال گاع اللحايا! ماتقيسهمش غي فداكشي ديال حقوق المرأة والمدونة ودير لي بغيتي! تاهوا قاليك ماشي مشكل إلى ولاد المغاربة ماكايقراوش مادامو معمرين الجوامع !

الدولة المغربية بجلالة قدرها مبلبلة بهادشي ديال الإضرابات د التعليم، الحكومة خدّامة، الوزراء، التنسيقيات، النقابات، كلشي خدّام باش يلقى الحل لهاد المصيبة لي وقعات هاد العام! العالم كامل عارف أهمية المدرسة والدور ديالها الخطير! منظمات عالمية كاتخدم غير على التمدرس ديال الأطفال وكاتقاتل باش توفر التعليم حتى لمزاليط العالم فالدول الأكثر فقرا! حيت العالم كامل واع بأهمية المدرسة فخلق إنسان واع، مواطن صالح لراسو قبل مايكون صالح للمجتمع، دور المدرسة فالترقي الاجتماعي، إلاّ واحد بولحية كاينافس فتيحة روتيني اليومي ففلوس الادسنس! بوحدو فالعالم كامل لي ماسوقو لا فولاد المغاربة لا فمستقبلهم! يقراو مايقراوش ماسوقوش هوا! المهم بالنسبة ليه هوا يعمّرو الجوامع وكفى بها نعمة !

واش الجامع كايعلّم الرياضيات؟! التكامل؟! الدوال؟! الجامع فيه الفيزيك والعلوم الطبيعية؟! فيه اللغات؟! فيه الفلسفة ؟! فيه الشيمي؟ واش الجامع فيه شي مختبر يقدر يديرو فيه الدراري تجربة علمية ولا يشرّحو فيه عين بقرة ولا يشوفو الجهاز العصبي ديال شي جرانة ؟! طبعا لا! الجامع فيه أساتذة اختصاصيين فالمواد ديالهم؟! لا! الجامع فيه الكفاءات لي غاتسهر على تعليم ولاد المغاربة ؟! لا لا لا !

علاش فاش كايمرض بولحية براسو وكايمشي لعند شي أورولوگ اختصاصي فالمسالك البولية يدير ليه فحص البروستات، داك لورولوگ قرا التخصص ديالو فالجّامع؟! فاش كايبغي شي مهندس يدير ليه البلان ديال الدار طروا زيطاج، داك المهندس المعماري قرا فالجامع؟! وربان الطائرة والفرملية والدراري لي واقفين فالمعامل ديال الطيارات فالنواصر قراو فالجّامع؟

الجامع مكان للعبادة وحفظ وقراءة القرآن الكريم وصافي! كايمشي ليه المسلم فحالي كايمشي النصراني للكنيسة من أجل العبادة والطقوس الدينية، ماشي باش يقرا ويبني مهارات ويصنع المستقبل ديالو!

ولكن اللحايا عزيزة عليهم هاد الهضرة العوجة لي كايدغدغو بيها المشاعر ديال ضعاف العقول! آسيدي نحن لا ندوخ المدرسة مهمّة ومهمّة بزّاف، ماغانقارنوهاش بالجامع والدليل أنه فعز كورونا الدولة دغيا لقات حلول وحلات المدارس! ماقدراتش الدولة تتحمًل تكلفة إغلاق المدارس لمدة طويلة في حين الجوامع راه بقاو سادّين اكثر من عام ونص واقيلة عاماين حيت كاين البديل وإالى ماصليتيش فالجامع ممكن تصلي فدارك !

المدرسة لا! ماعندهاش بديل! بزاف ديال ولاد المغاربة إلى ماقراتهمش المدرسة العمومية ماعندهم حتى شي بديل من غير الشارع!

إقرأ الخبر من مصدره