كود كازا ///
هادي جوج سيمانات بطريقة ما فهمها حد فكازا٬ تعطات كنيسة “ساكري كور” بشارع الراشدي باش تقدم فيها شي وحدة اسمها حديوي ليلى تخربيقاتها كتسميها “موضة” وشي تخربيقة مسمياتها الدورة 10.
هادي اللي ولات ستيليست بزز من كلشي٬ تعطاتها الكنيسة اللي خسرات عليها مدينة الدار البيضاء فلوس صحيحة باش تعاود تصلح وتفتاتح.
مول هاد الجريمة ديال منح امثال الحديوي هاد الفضاء التاريخي خاصو يتحاسب.
البارح لثلاث 19 دجنبر 2023 كذبو على بيضاوة وعلى ناس الدولة باش قالو باللي الاوركسترا الفيلارمونية المغربية دارت حفل موسيقى “في إطار الاحتفال بإعادة افتتاح كنيسة القلب المقدس عقب إعادة تأهيلها”.
يعني عطاوها هادي 15 يوم لهاديك النكرة ودابا كيكذبو بهاد الجملة “في اطار اعادة افتتاح… بعد تأهيلها”.
الكذاب قولب عمدة الدار البيضاء ووزير الثقافة والتواصل اللي حضرو البارح لهاد النشاط. كذبو علي نائبة مدير الأوركسترا الفلهارمونية المغربية كارولين سونيي اللي قالت فتصريح لوكالة المغرب العربي للانباء باللي فرحانة بالتواجد فهاد المعلمة التاريخية” التي تم تجديدها لتفتح أبوابها مرة أخرى للعموم”. طبعا ما فراسهاش باللي كان فيها تخربيق تواطئو فيه مسؤولي كازا باش دارو ديفيلي ديال ديك حديوي
تصورو الاوركسترا الفيلارمونية المغربية اللي تأسسات ف1996 وقدمات البارح معزوفات لموزارت ودارت مجهود كبير تتقولب. بيعوها فكرة ان حلفها افتتاح للكنسية بعد اعادة اصلاحها.
شفتو كيفاش كيتعاملو مع الثقافة فكازا. كيفاش كيهمشو الثقافة. لفضيحة ان هاد الكنسية كانت واجدة كثر من عام ويالله تحركات. تحركات بطريقة مهينة للكازاويين بداك الديفيلي.