سهام البارودي- كود//
المغربية سوسن بنت الرباط لي كايجي رمضان و ماكاتبقاش تكحل حيت الكحل كايفطّر و كاتقوّي من المحاضرات ديال الدعاة ! كاتبدا تصلّي و كاتكون عاد خرجات من شي علاقة غرامية فاشلة ، كاتقرر تبدل حياتها و دّير الحجاب ! كاتمشي كاتشري الحوايج من القيسارية و الزيوف بالألوان و كاتبدا تلبس الطويل و تغطي راسها و كاتفرح فاش صحاباتها فالخدمة كايقولو ليها ” درتيه ؟” ” مبروووك” “العقبة لينا” فحالا حققات شي انجاز ! و حتى نهار يطلع ليها فراسها و مايبقاش لامود و تبغي تحيدو ! غاتقدر تحيدو ! ايه غايشوفو فيها نفس صحاباتها شوفة عوجة ” حيديتيه ؟” و لكن غاتحيدو و غاتعيش حياتها عادي من بعد !
هادشي علاش سوسن ماعمرها غاتحس بالعيالات لي مفروض عليهم داك الحجاب و كايديروه بزز منهم ! ماعمرها غاتحس ب”جويرية” المراهقة المغربية لي تزادت لقات راسها وسط عائلة سلفية باها داير لحية قد الشطابة و مها كاتخرج بالنقاب و فرضو عليها تلبس الحجاب فالكوليج و تموت بالصهد فالحصص ديال الرياضة و ماتمتعش بسنوات الطفولة ديالها فحال صحاباتها و ماعندهاش الحق تحيدو ! ماغاتحسش بديك الإيرانية و لا ديك الافغانية لي الى مادارتش الحجاب تقدر تقتل و لا يجي شي هبيل يحرق ليها وجها بالما القاطع !
المرا لي دايرة الحجاب باش ضبّر على شي فيكتيم يتجوج بيها و لا باش ترضي الراجل و لا حيت عگزانة تصايب بروشينغ كل مرة و لا حيت بصح يصحابها الى مادارتوش ربي غايحاسبها ماغاتحسش ببزاف ديال العيالات عبر العالم لي دايرينو بزز منهم و ماعندهم حتى شي خيار آخر من غير الموت ! التعذيب و الضرب و الموت هذا هوا المصير ديال الملايين د للعيالات عبر العالم لي رافضين الحجاب !
هادشي علاش انا شخصيا كانشوف انه أي وحدة كادير الحجاب راه كاتلعب دور فالبؤس ديال نساء وحدين اخرين بعاد عليها بمسافات ايه ! ماكاتشوفهمش ! ماكاتحسش بيهم ! و لكن راه كاتساهم بشكل كبير و مباشر فأنه يعيشو المأساة !
حيدي الحجاب و ساندي العيالات عبر العالم لي كايتعذبو بسبابو ! حشومة وحدة تمشي ليها عين بسبب الحجاب و نتي خارجة تختاري شي “دريرة” فالفانيدي تجيك مع اللبسة الجديدة لي شريتي !