ايت منة اش لاحك للوداد وديها ففرقتك. الحمرا كبيرة عليك وعلى امثالك

مصطفى الشاذلي – كود سبور ///

هشام ايت منة كيموت على الضو. عزيز عليه يبان. اليوم لعبات الوداد البيضاوي ماتش مؤجل مع نادي يوسفية برشيد بملعب البشير فالمحمدية. ماتش مهم بزاف لانو اللول بعد اعتقال رئيس النادي سعيد الناصري فقضية ما يعرف بايسكوبار افريقيا “المالي”.

ايت منة دار تصريح ل”كود” باش سولوه على واش ممكن يكون رئيس للوداد”٬ باللي “كلشي ممكن”.

https://fb.watch/p6YAVfq1px/

المشكلة ماشي فالجواب على هاد السؤال وصافي٬ بل كيفاش تصرف اليوم. تصرف كواحد يموت وياخد الحمرا. ها هو مع المدرب البنزرتي٬ مدرب الوداد الفوق حقاش ما عندوش الحق يكون فالبون توش٬ ها هو داخل عند اللعابة. ها هو داخل للتيران.

السي ايت منة ديها ففرقتك. ياك انت رئيس للمكتب المديري لشباب المحمدية٬ وديها غير فهاد الفرقة. اش لاحك للوداد. دابا من حق الواحد يشكك فموقفتك وحضورك ليلة تقديم سعيد الناصري ليلة لخميس بالليل. ما كانش عندو علاقة بالصداقة. كا فيه انتهازية وصافي.

فرقتك الشباب ومدينتك اللي انت رئيس مجلس بلديتها محتاجينك ماشي الوداد. انت ما عندك علاقة بالحمرا بحالك بحال هادوك اللي خرجو وبحقارة كيقولو راه جماهير الوداد باغياهم.

الوداد عندها مكتب وغادية تسلك امورها وتعقد جمعها العام ويخرج هاد الجمع العام مكتب مديري ورئيس. استغلال ظروف بحال اعتقال الناصري راه ما ينفعكم فوالو.

راه العبث ايلى ايت منة خدا الوداد. فشل ففرقتو باش تربح الخضرا. حلمو الابدي. باش توصل لمرتبة تشارك فيه فشي مسابقة عربية او افريقية٬ كيفاش يفكر كيف كيدير دابا ياخد نادي اخر.

إقرأ الخبر من مصدره