من بعد اليوتوب! اليوم تيك طوك عرّا على واحد الواقع بزّاف ديال المغاربة كايرفضو يعتارفو بيه ! ديك الهضرة ديال المغاربة محافظين والتقاليد و الحشمة، أسطورة كانكذبو بيها على راسنا ! المغربي لي فالتيك طوك مستعد يشطح و يخوي البيض على راسو و يدير اللايڤات بمّو و حتى بنتو لي مريضة بالتوحد باش يدخل الفلوس و لا صوت يعلو فوق صوت ميمّي و كبسو كبسو !

سهام البارودي – كود//

حتى لهنا لهنا قبل دمقرطة الانترنيت و دخول اليوتوب و التيك طوك كانت الصورة لي متافقين عليها بزاف ديال المغاربة هي انه المغرب دولة محافظة و حتى الدولة براسها فاش كاتشرّع القوانين راه كاتراعي لهاد المسألة، و وواخا كاتبغي تخشي شوية د الحداثة كاتبقى مراعية للتيار المحافظ فالبلاد و كادير ليه خاطرو حتى هوا ! ايه دولة محافظة ماشي فحال السعودية ( ديال ما قبل بن سلمان) و لا مصر لي فيها العيالات كايتقتلو فجرائم الشرف بالعرام و الثأر متجدر فالتقاليد  و لكن من ديما المغرب كان محافظ بالستيل ديالو حتى هوا ! مرات الراجل موقّرة و العيالات الكبار موقرات و الحشمة و الحشومة و التقاليد و مجموعة من القواعد المجتمعية كايتعامل معاها المغربي على اساس انها هي الأصل !

عا تا جا اليوتوب و فلوس الادسنس و هوما يتفرگعو علينا الڤيديوات ديال روتيني اليومي وولينا كانشوفو الترامي ديال عيالات الرجال مزيرين عليهم وسط الكولونات و كايشتفو على الكواش و الزرابي فالسطوحة ديال السكن الاقتصادي ! السلام حبابي اليوم غانحك معاكم الحمام ديالي و غانوريكم الكادويات لي وصلوني ! المرا كاتلوز فالفيديو و راجلها شاد الكاميرا ! آجي سيمحمد آجي سلّم على المشاهدات ! فلوس الادسنس عرات على الترامي و خلات المؤثرين يدخلو المشاهدين ديالهم حتى للبيوت د النعاس و تفرجنا فالمضاربات بين الأم و بنتها و العگوزة و مرات الولد و النسيبة و راجل بنتها و بزاف ديال القضايا وصلات للحبس …
و اليوم مع التيك طوك ! النيڤو زاد طلع ! و نقدرو نقولو انه بزاف ديال المغاربة من جميع الفئات و الاعمار عرّاو على اللاَص ! صافي ! مابقا مايتخبى ! شفنا الشطيح و التلواز و التكواز و المعاطية و تخسار الهضرة و شفنا حتى الاستغلال ديال الاطفال و المرضى و الحمّاق و الشيبانيين ! مرا شيبانية و حتى هي جالسة مع ولدها دايرين اللايڤ حتى للجوج د للليل باش تدعي مع المشاهدين ! سيرو آ وليداتي الله يسهل عليكم و جحفلو جحفلو و كبسو الله يرضي عليكم ! كون كان الدعاء ديالك مقبول گاعما تبقاي سهرانة مع البراهش آ الشريفية ! شفنا الأمهات دايرين بناتهم عندهم اعاقة ذهنية فون دو كوميرس ! في الوقت لي الاطفال فالعالم كامل ناعسين ، كاينين اطفال مغاربة سهرانين فاللايڤات كايطلبو المشاهدين يسيفطو ليهم شي أسد !

بزاف ديال البؤس و الفقر و الزلط و الاهم من هادشي سقوط الاسطورة لي كاتقول انه المغاربة محافظين ! محافظين علاش ؟! الله اعلم ! طبعا ماشي كلشي، ماشي گاع المغاربة و لكن راه نسبة مهمّة و كبيرة بزاف و كل نهار كاتبان عائلة جديدة فالتيكطوك كل نهار مرا كبيرة جديدة كل نهار معاق جديد كل نهار بنت و لا ولد عندهم التوحد … كلشي ولا باغي حقو من فلوس التيكطوك!  كلشي باغي يدير ڤيلا و قهوة و صالون فحال اسماء بيوتي ! كلشي باغي يوصلوه الكادويات من الجالية ، كلشي كاشكي و يكبي و تعانو معايا ا خوتي نخلص الكرا!

عكس الاصوات لي خرجات مؤخرا كاطالب بوقف التيك طوك ! انا ضد هاد الفكرة ! حيت غانوليو فمصيبة كبيرة الى الدولة ولات كاتحكم فالتطبيقات لي يمكن الانسان يستعمل و كيفاش غايتسعملها ، فيناهي الحرية ؟ غانوليو فحال كوريا الشمالية ! بالعكس خاص التيك طوك يبقى و لاكانت عندو حسنة وحدة فا هي انه ورّانا وجهنا فالمراية ! وجه المجتمع لي كايداعي انه محافظ و يقدر يسلخ مثلي فالزنقة و يضرب شي بنت كاتشرب الما فرمضان و يعيط ليك للبوليس لاجبتي صاحبتك للدار و يبغي يخرج السروال فصباح العرس و هاهوا فوق راسي لاتقولو فارماسي و لكن فنفس الوقت ماعندوش ادنى مشكل انه مرتو تشتف على المازافيل بالكيلوط و العالم يشوف سفّاحتها.

إقرأ الخبر من مصدره