أنس العمري -كود///
صداع تخريب موقع “واخير” الأثري بزاكورة وصل للرباط. فوفق ما ذكرته مصادر جمعوية محلية، فإن لجنة من وزارة الشباب والثقافة والتواصل وصلات، البارح الاثنين، للجماعة القروية كناوة باش تبحث فهاد الواقعة توقف على تفاصيلها.
ويتنظر أن هاد اللجنة تنجز تقرير يتضمن نتائج كاع الخبرات لي غادي تدار على هاد الموقع لي كلا لعصا وتدمرات فيه أجزاء مهمة، ولي على ضوئها يتشاف شنو غادي يتقرر.
وكان موضوع هاد الواقعة فجر جدل كبير، وناضت مجموعة من الهيئات والفعاليات طالبات يتفتح تحقيق في هاد الشأن، وبالتدخل العاجل من قبل الوزارة الوصية باش يوقف مسلسل التخريب لي كيطال التراث الأثري.
من جهته، استنكر المرصد الوطني للتراث الثقافي تخريب الموقع الأثري المذكور والمسجل في فهرس مواقع النقوش الصخرية تحت رقم 150039، بسبب أشغال رافقت إنشاء ضيعة فلاحية خاصة بزراعة البطيخ الأحمر، من “طرف الآليات الثقيلة التي استعملت من أجل شق المسالك وإعداد الحقل وحفر الحوض المائي”.
وكان الفلاح لي ورا هاد الواقعة كال، فتصريحات إعلامية، أنه مكانش عارف بأن هاد البلاصة موقع أثري.