البكا ورا الميت خسارة: الكابيتان سايس حتى هو خرج يطلب المسامحة على الإقصاء وانه كيتحمل المسؤولية وثقتو فالركراكي

گود سبور//

خرج رومان سايس كابيتان المنتخب الوطني المغربي، يتكلم على الخسارة مع جنوب إفريقيا فثمن نهائي كوب دافريك، والإقصاء بكري من المسابقة اللي كان المغرب المرشح الاول للتتويج بها فالكوت ديفوار.

سايس خرج اليوم الجمعة فالعشية باش يهضر على الإقصاء وقال فبوسط على أنستغرام: “داز ايام على إقصائنا ولكن مازال صعيب وصف هذا الشي بالكلام، كنحسو بخيبة امل كبيرة بسبب نتيجة كوب دافريك اللي سالات قبل الوقت بالنسبة لنا”.

وكمل سايس: “كنطلب المسامحة من گاع المغاربة اللي كيحسو بالحزن والغضب اليوم بعد هذا الفشل وكنشكرهم على دعمهم لنا فالسرا والضراء، وديما المساعدة ديالهم كانت قوة إضافية لمواجهة الصعوبات”.

وزاد الكابيتان: “درنا كلشي اللي على بلادنا المغرب والجمهور المغربي ولكن هذا الشي ما كانش كافي اليوم باش نمشيو بعيد، حنا عائلة ملي كنربحو كنربحو كاملين واليوم خسرنا كاملين، وحنا كنتحملو المسؤولية كاملة على هاد خيبة الأمل، وانا اول واحد كابيتان”.

سايس قال ايضا: “خاصنا نستوعبو هذا الشي ونزيدو للقدام بالخدمة باش نوصلو للأهداف ديالنا وتبقاو متحدين، مع بعضنا، عندي ثقة فهاد الگروب والمدرب والطاقم، وهاد العائلة باش نرجعو الضحكة والفرحة للشعب المغربي اللي كيعشقو الكورة”.

إقرأ الخبر من مصدره