گود سبور//
حضر التونسي فوزي البنزرتي تداريب الوداد الرياضي اليوم الجمعة فتيران بنجلون، وهذا الشي بعدما تراجع على الاستقالة من الفريق بعد اجتماع داروه معه المكتب المديري البارح الخميس.
وجمع فوزي البنزرتي لاعبين الوداد الرياضي اليوم فحصة تدريبة اخيرة قبل الماتش المهم ضد نهضة بركان برسم الدورة 19 من البطولة الاحترافية اللي غيتلعب غدا السبت فتيران البشير فالمحمدية، باش يوجدهم للمباراة اللي مطالب فيها الفريق بتحقيق الرباح بالأداء والنتيجة بعد الخسارة الكبيرة الماتش الماضي ضد شباب السوالم.
الاجواء فالحصة التدريبة اليوم ديال الوداد كان مزيانة، وحاول فوزي البنزرتي مع الطاقم التقني ديالو يوجدو اللاعبين بدنيا ونفسيا وذهنيا، باش يخرجوهم من جو الإحباط اللي خيم على الفريق بعد هزيمة السوالم، خصوصا وان المدرب كان علن على الاستقالة مباشرة بعد الخسارة واكد انه ما كانش راضي على عدد من اللاعبين فالفريق.
ومطالبين الوداد الرياضي باش يربحو الماتش غدا السبت ضد نهضة بركان، للخروج من جو الخسران ويرفعو المعنويات ويحاول على الاقل يبقاو قراب من المراكز ديال مقدمة الترتيب حيث الصدارة ولات بعيدة وبفارق 12 نقطة.