سهام البارودي ـ كود//
شي مغربيات مساكن، كايصحابهم الحياة ساهلة، غاتسمح فقرايتها وخدمتها ووظيفتها وتجوج بشي واحد لاباس عليه يصرف عليها ويعيشها فڤيلا ويبدل ليها الطوموبيل كل عام وصافي هاهي هاكات الحياة! قرصنات المستقبل! شنو كايبقى خاصها؟! كايبقى خاصها غا كيفاش تعلم تتحكم فالراجل وكيفاش تجاوب العگوزة إلى قالت ليها نتي معفونة وكيفاش تجاوب اللوسة إلى عايراتها وصافي! كايصحابها الحياة الزوجية كاملة دايرة على شوية ديال اللايڤات ديال إيمان كوين! الحياة الزوجية كاملة فيها غي الراجل واللوسة والعگوزة وكيفاش ضاربي وكيفاش تعاطاي وكيفاش تكوني قبيحة!
هادشي يمكن كان كايصدق شحال هادي! فاش كانو العيالات كايصوڤيهم الزواج! كاتلصق فشي راجل ثمانين عام حتى يدي مول الأمانة أمانتو حيت كايصرف عليها وماعندها فين تمشي من غيرو! ولكن دابا لا؟ شكون دابا مازال كاتقبل تمرمدها العگوزة واللوسة والشيخ والراجل! شكون هي المرا المدلولة لي ف2024 غاتقبل العگوزة تعايرها ولا اللوسة تخاصم عليها؟! حتى دوك البنات القاصرات لي كايتجوجو فالعروبية مابقاوش كايقبلو بهاد البسالة! وواحد النهار كايتفرگعو! هانتي گاع كاتعرفي تعاملي معاه ومع واليديه و مع خوتو ومحبوبة وزوينة وحادگة وبوگوصة ولكن علاش يا بنت الهبيلة ماكاديريش فبالك إمكانية الفراق واحد النهار؟! واحد النهار غاطلعي ليه فراسو! إيه واخا زوينة وبوگوصة وكاتعاملي مزيان مع مو وخوتو تقدري طلعي ليه فراسو راه بنادم هذا! واحد النهار يوقع مشكل! كيما كاين احتمال اللقاء فالحياة والزواج كاين حتى احتمال الطلاق! علاش يا الهبيلة كاتنساي هاد الاحتمال أو بالأحرى كاتبغي تناسايه؟.
راه لا يصح إلا الصحيح فاللخر! الاستقلالية المادية ديال المرا هي أساس العلاقة! خاصك تكوني بقرايتك بخدمتك بفلوسك باش نهار تحرار العيشة معاه تكوني قادرة تهزي حوايجك وتمشي بكرامتك! نهار يوقع الفراق ماتبقايش لاصقة فيه كاتبكي فحال مّو! صافي تلاقيتو خوت تفارقو خوت! راه فالعلاقات الزوجية دابا الطلاق هوا القاعدة والاستمرار هوا الاستثناء، غاتقوليا علاش؟! غانقوليك حيت الحياة كاتبدل بسرعة ودوك الميكانيزمات لي كانو كايحكمو الزواج شحال هادي مابقاوش دابا! خصوصا من جيهت المراة لي شحال هادي كانت مجبرة أنها تبقى مزوجة كيما كان الراجل تستحملو حتى تموت هي وياه (ضربها عايرها سلخاتها فاميلتو دفل عليها خوه تجوج عليها…) كاتبقى حيت ماعندها فين تمشي أما دابا لا! دابا واخا تعرف تحل “قانا” فاليوتوب تصور لينا فيها مؤخرتها كادير روتيني اليومي وماغاتبقاش مع شي بوراس كايبوّطها صباح مساء. هادشي علاش الطلاق كايتزاد وغايزيد يتزاد …