كود كازا //
بعد ما سالى بيدرو سانشيث رئيس الحكومة الاسباني زيارتو للمغرب نهار الاربعا دار ندوة صحافية. هاد الندوة الصحافية شوهة بكل المقاييس. حضرها الاعلام الاسباني وغاب عليها الاعلام المغربي باستثناء العمومي وصحافي من موقع واحد. الغباء ان وزارة الاتصال اللي تكفات بتدبير هاد الشي كتقول باللي القضية فيها لقصر الملكي. يعني المكلفين بالتواصل فالقصر الملكي هما للي كيختارو الصحافيين.
المهم ان هاد التصرف عطى مصداقية لوصف الصحافة الاجنبية وخاصة الاسبانية بللي هاد الموقع “مقرب من القصر الملكي”.
اقصاء وزارة الاتصال للصحافة المغربية فيه احتقار ليها وفيه من الجهة الاخرى الهواية اللي كيتعامل بيها بنسعيد مع هاد القطاع.
كاين فالمغرب للي متبع ملف العلاقات المغربية الاسبانية مزيان وقصاوهم. وقصاو حتى النسخة الاسبانية من “الزنقة 20”.
الصحافيون الصبليون تواصلو مع بعض الصحافيين واستغربو هاد الاقصاء. كانو كيرسلو تفاصيل هاد الزيارة من البرنامج حتى تفاصيل الاستقبال الملكي. فبلادهم كاين برفين ومد بالمعطيات بالتفاصيل وفالمغرب حتى الحضور ممنوع. مخليين دياولهم. فضيحة وزارة بنسعيد
Laisser un commentaire