سهام البارودي ـ كود//
الدولة فاش كاتحارب البرارك راه من بين الاسباب ديال هاد الحرب هوا صورة البلاد، و على صورة البلاد تبنى موروكومول أكبر مول فإفريقيا و على صورة البلاد تبنات قنطرة محمد السادس و برج محمد السادس و على صورة البلاد نايضة القيامة الكحلة. فاش كاتحيد الكاريانات فراه باش ملي يدوز السائح فالتران و لا فالكار مايبانوش ليه البرارك و البنيات صغار مشككين كايسگيو الما من شي سقاية !
ولكن آكوا بون ؟! علاش ؟ الى كان نفس الانسان بنفس مظاهر البداوة غايسكن ليك فعمارة و حتى فڤيلا ! حيت هاد مظاهر البداوة كاتشوفها فإعادة الإيواء كيما تقدر تشوفها فالسكن الاقتصادي و حتى فالهوسطوندينغ ماكاينش فرق من غير فلاكاليطي ديال الكواش و الگراصن لي منشورين !
دابا كادوز من حدا الاغلبية د العمارات كاتلقى الگراصن ديال مول الدار و مولات الدار منشورين و الكواش كايتشمشو و شي توني كاشف ديال زهير العروبي فاش كان كايلعب فالوداد، أما البالكونات فراه من الاغلبية الساحقة سادينهم بالأليمنيوم و معمرينهم بالبانويات مثقوبين و المقالي و شي كوكوط ماعندهاش وذن ! واش زعما دوز و تلقى شي كوبل كايشرب قهوة فالبالكون مع العشية و دايرين بيه النباتات و اللواية ؟! البعابع لالقيتي هاد المنظر ! المنظر لي غاتلقاه فالاغلبية الساحقة ديال العمارات و الديور هوا البداوة ! مظاهر البداوة لي طاغية على اغلب المدن المغربية، داكشي علاش كاتلقى بنادم فالفايسبوك كايسول ” الخوت جاري كايحط صنادلو وسباسبطو و هناكرو قدام الباب واش عادي” و كايجيو الاغلبية يجاوبوه ” عادي دارو هاديك “! بنادم يقدر يسكن فعمارة و هوما ماعندوش ابجديات السكن المشترك، ابجديات الجمال… النقى، المنظر … كايشوف هوا الدار غا حيوط غايتخشى فيهم و صافي ماكايشوفش بلي كاينة واحد الجمالية حتى فالسكن !
داكشي علاش مادام مظاهر البداوة طاغية فراه كي والو ! نقدرو غدا نصلحو التعليم و الصحة و نوصلو البراق حتى لأگادير… مادام بنادم كاينشر گراصنو فالشراجم و بيبان الديور و البالكونات ! راه كي والو !