سهام البارودي ـ كود//
فاش كنا صغار كنا كانقراو بلي المغرب بلد فلاحي ، بالمقابل فاش كاتحل الخريطة كاتلقى المغرب كولو صفر من غير ديك الجيهة بين العرايش و طنجة ! شوية د الخضورة و ماتبقى كلشي صفر !
زيد على هادشي الطريقة البدائية باش كاتمارس الفلاحة عندنا، و لي عرات عليها هاد الازمة د الماء مؤخرا، تخايل معايا أنه المغربي لي سميتو المعاشي، ف2024، مازال مايمارس الفلاحة بنفس الطريقة لي مارسها الانسان الأول فالعصر النيوليتي، اي واحد ربعطاشرألف سنة قبل ميلاد المسيح، واحد عايش فالقرن الواحد و العشرين كايمارس الفلاحة بنفس الطريقة البدائية لي كان كايمارسها بيها واحد مغطي سفاحتو بورقة د البانان ! كايلوح البذرة فالتراب و يگلس حداها يساين الشتا تصب !
بلد فلاحي و فاش كاتجي تشوف كاتلقى اكثر من تسعين فلميا د المساحات الزراعية فيها اقل من خمسة هكتار، و العمال الفلاحيين الاغلبية الساحقة فيهم كايخدمو فظروف لا إنسانية كل ساعة نسمعو بشي بيكوب تقلبات فشي فيراج و ماتو فيها خمسة و لا عشرة د العاملات الفلاحيات !
فاش كاتشوف الدول لي كاتعتابر راسها دول فلاحية فالعالم، فراه كاتلقاها عندها جميع الامكانيات الطبيعية و العلمية و الصناعية باش تمارس الفلاحة، حيت الفلاحة كاتبغي القراية تاهي، كاتلقى عندها استراتيجية واقعية ديال الفلاحة، شكون هوما اكبر دول فلاحية فالعالم ؟! فراس اللائحة كاتلقى ميريكان، تابعاها هولاندا و المانيا و البرازيل و الشينوا… دول صحيحة ! كبيرة ! واعرة ! عندها جميع المقومات باش تسمى دول فلاحية، حنا زرعنا لاڤوكا غا عشر سنين قربنا نموتو بالعطش ! و سادين الحمامات و اللاڤاجات و العيون و الآبار وكحات !
منين جانا بلد فلاحي ؟! و باش فلاحي بالفم ؟! فاش كاتسول على اساس هاد التسمية كاتلقى بلي غير حيت الفلاحة هي المشغل الاول داكشي علاش تسمى البلد فلاحي، مع بنادم بزاف لاقراية لاخدمة غي لي كايبريكولي شوية فالفيرمات و ليصير يتسمى تاهوا خدام و يتحسب عامل فلاحي خدام فالقطاع الفلاحي.
هاد الازمة د الماء لاكانت عندها فائدة وحدة فغتكون هي انها وراتنا وجهنا فالمراية و عرفنا بلي حنا ماشي بلد فلاحي و ماعمرنا غانكونو بلد فلاحي خصوصا مع هاد التغيرات المناخية !
Laisser un commentaire