سهام البارودي – كود//
انا شخصيا ماكانحملش فتيحة روتيني اليومي، برودية الكتاف ديالها كاتستافزني ! كيفاش مرا صحّ منّي ! كتافها و ركابيها قدهم قداش ماتخرجش تخدم فالميناج، ماتجيش عندي دير ليا الميناج و تنفض الغبرا و تشتف و تصبن و تسيق ! كيفاش تجلس مرتاحة تصور ڤيديوات فاليوتوب فدارها و تدخل الفلوس ! كيفاش تهرب من المصير ديالها المحتوم لي هوا الميناج و تولي تاهي كاتخدم طيليطراڤاي فحال بنات لونسيجي و ليسكاو و الاطر العليا فالمغرب ! هادشي كايستافزني ! و كانظن بلي هادشي بالضبط لي كايستافز بزاف ديال الناس ! كيفاش الحمّاق و المعتوهين و لي ماقاريينش و الجهّال و القحاب يوليو كايدخلو الزبابل د الفلوس من اليوتوب بلا مايحتاجو للشفقة ديالنا و البقشيش ديالنا ! كيفاش ماياكلوش من الفتات لي كايطيح لينا من الطبلة ؟ كيفاش مايسعاوناش ؟ مايبكيوش علينا ؟ مايميخلوش فالزبل ديالنا ؟
و ماشي غير هادشي ! راه ولاو ينافسونا حنا لي قاريين و خدامين عندنا مكانة اجتماعية ! نيبا كايضرب ثلاتة د البريكات فالشهر لي طبيب ماكايوصلهاش ! نيبا ، مي نعيمة، ندى حاسي ، وا نزار السبيتي غا مسطّي و كايدخل احسن من الصحفيين د گود !
اليوتوب خربق دوك البديهيات لي من ديما و حنا كانآمنو بيها ! ديك الهضرة لي كاتقوليك ماماك ” لاماقريتيش مزيان غاتولي فحالو” ايوا هاداك فحالو دابا ولا كايصور احسن منك ! ندى حاسي كاتعيش احسن من موظفة فالبنكة، من استاذة، من فرملية ، من بوليسية … نيبا عندو رونج لي ماعندش كوموندون فالعسكر !
كانظن هادشي بالضبط لي كايديرونجي الناس ففتيحة و لي فحال فتيحة ! هادشي لي كايحقّد البشري ! ماشي ديك الهضرة ديال الاخلاق و حنا مغاربة و كايشوهونا و و و …
فتيحة ديرونجات المغاربة حيت وراتهم وجهّم فالمراية، نقلات ليهم الواقع لليوتوب ! علاه شنو بغيتو تجمعو الزلط والجهل و الاغتصاب و الحگرة و يخرجو ليكم مواطنين صالحين زوينين عندهم كرامة عندهم اخلاق ؟ اشمن اخلاق اولد عمّي ؟
آ لاّا آ سيموحمد ! فتيحة روتيني اليومي هي الوجه الحقيقي لبزاف د الناس، الوجه الحقيقي للمجتمع، للمغرب، للمغاربة، لي ماشي مثاليين و ماشي محافظين و ماشي واعرين ! المغاربة ناس عاديين ،نورمال ، فيهم تاهوما الحماق و المرضى والطماعة و الهيماج و و و بزاف كايديرو اخنز واقبح و ابشع من داكشي لي دارت فتيحة و لكن حسّي مسّي!
و انك تشد فتيحة روتيني اليومي فالحبس راه ماشي هوا لي غايصنع ليك داك المجتمع الخيالي لي كاتمنّاه، ديك المدينة الفاضلة … نورمال تكون فتيحة فاليوتوب وتخرا فاليوتوب مادامو كاينين الظروف لي كايصنعوها و يكون مروان المحارزي العلوي و يكون نزار السبيتي و ندى حاسي و السديس و نوستيك و و و و … و كولاّا كايتقدى من اليوتوب السلعة لي عاجباه !