هاداك لي باغي يقاطع دوزيم على ود المثلية وكيدافع على المتطرف أبو عمار وكيعتابر العماري مرجع ديني وعاجبو ولد البسطاوي حيت ربى اللحية هو نيت لي إلى مرتو مرضات أو بنتو كيجيب ليهم راقي شرعي حتى للدار حتى كيصدق مغتاصبهم بحال لي وقع في فاس فين إغتصب راقي شرعي بنت عندها 12 عام

محمد سقراط-كود///

هاداك لي باغي يقاطع دوزام حيت غادي تجيب شخصية مثلية في انتاجات رمضان وكيدافع على المتطرف أبو عمار وكيعتابر العماري مرجع ديني وعاجبو ولد البسطاوي حيت ربى اللحية وكيهدر في الدين عوض يمشي لطبيب نفسي هو نيت لي إلى مرتو مرضات أو بنتو كيجيب ليهم راقي شرعي حتى للدار حتى كيصدق مغتاصبهم بحال لي وقع في فاس، حيت إغتصب راقي شرعي بنت عندها 12 عام، وراه غواتها يقدر يكون وصل للجيران مخلط مع الحمدو وصورة الكوثر والمعوذتين، ومع ذلك غادي تلقى عائتها كيسمعو داكشي وكيقولوا راه راقي مزيان هذا سمع الجن لي ساكنها كي كيغوت ربي لي خلقوا، زيروا هاد الراقي والله حتى زيروا مجهدـ خاص نديوه يشوف مع بات البنت حتى هو واقيلة مسكون مع لي حط فيها يديه مكتيسرش ليه.

كل شهر كتسمع شي جريمة إغتصاب أو نصب دارها شي راقي شرعي، وهادشي غير لي حصلو لي محصلوش راه عدد، ومع ذلك باقين الصفحات ديالهم خدامين في الفايسبوك ومحلاتهم معروفين  و ولاو منهم شخصيات عمومية ومشاهير الرقاة، تخايل يكونوا عند في البلاد مغتصبين ونصابة مشاهير، ومع ذلك مكاين لي قاليهم شحال في الساعة، راه خاص خطبة الجمعة يهدرو فيها على الرقية الشرعية ويحذروا من الرقاة، ويفهموا المغاربة بلي داكشي ماصالح لوالو غير نصب وإحتيال، القرآن يقراه الواحد الى كيآمن بيه أو كيحس براحة فاش كيقراه، أو يتصنت ليه بصوت شي مقرئ صوتوا زوين بحال الشاب رزقي، ولكن باش تولي القرائة ديالو كتباع بالزبابل ديال الفلوس وكتطلب طقوس خاصة، فيها الخلوة والغرف الكاتمة للصوت والدخاخن والبخور والصونوات بحال إلى شي سهرة ديال الستاتي ، هنا راه تحول هادشي لنصب وإحتيال وتعذيب وتحرش وإغتصاب.

الطبيب وراه كيداوي في الشك والنتيجة ديال الإستشفاء على يديه أو حتى تشخيص مثالي راه ماشي مية في المية مابقى غير الفقيه والعشاب والراقي، هاعلاش قالو المغاربة القدام العطار والفقيه لا تيقوا فيه، راه ماجاتش من فراغ، كاينة كمية كبيرة ديال الجهل بقا معششة في أدمغة المواطنين، وواخا تعميم الرعاية الصحية في المغرب باقي الناس كتخسر الفلوس عند الراقي والفقيه كثر ملي كانت غادي تخسر عند الطبيب والدوا، طبعا بلا منهدرو على الأعراض الجانبية لي كيتسبب فيها التداوي عند الرقاة والعشابة، ها لي خرجوا ليها فيديوات جنسية دمروا حياتها، ها لي تغتاصبات وحملات وكوارث كثيرة، وفي اللخر ينوضوا يلومو دوزام أو كود أو وكالين رمضان على  تفشي هاد الكوارث وهوما أبطالها الرئيسيين هوما الرقاة في كل مرة.

إقرأ الخبر من مصدره