سهام البارودي – كود//
ديك النهار واحد الجريدة ايليكترونية بارطاجات خبر عن مجلة فوربس كايقول بلي خمسة ديال العيالات مغربيات داخلات فقائمة 100 مرا الأكثر نفوذا فمنطقة مينا ( ماشي مينة بنت خالتك مينا : الشرق الاوسط و شمال افريقية) و على رأسهم كانلقاو سلوى أخنوش و مريم بنصالح شقرون ! ناخدو غير هاد الجوج باراكا، سلوى و مريم بجوج قاريات، سلوى عندها الاجازة فلونگلي و ماستر فإدارة الاعمال و التجارة الدولية من جامعة كاليفورنيا و مريم معروفة قارية فESCP وحدة من اعرق و اكبر و ارقى مدارس التجارة فأوروبا و عندها ديبلوم من جامعة دالاس ! و هاد جوج غير بوحدهم راهم مسيرين قشلة ديال الباشار و الشركات و الفلوس !
ولكن فاش هبطت نقرا الكومونطيرات لقيت واحد بوگرن كاتب ” وا كولهوم هادو دارو الفلوس على ظهر رجالاتهم” زعما راه مستحيل تكون المرا سيدة اعمال و تخلق فرص شغل و دير الفلوس الى ماكانش الراجل ! هاد العيالات بالقراية ديالهم بديبلوماتهم بشخصيتهم بتجربتهم و الخبرة ديالهم الطويلة فعالم البيزنس ماقادرين يديرو والو لولا الراجل !
علاش تفكرت هاد الحادثة دابا حيت هاد الصباح سمعت داك الاوديو لي منتاشر ديال نور الدين مضيان د حزب الاستقلال لي كايهاجم فيه رفيعة المنصوري، و كايربط اي نجاح دارتو بأنها كانت معاه و هوا لي صنعها و كون ماكانش هوا كون ماتكونش شي وحدة سميتها رفيعة المنصوري !
و هاد الديسكور هادا راه متداول بشكل كبير بين بزاف ديال المغاربة الرجال على الخصوص، مآمنين بلي المرا بوحدها مايمكنش ليها دير والو ! و لا دارت راه حيت كاين شي راجل عاونها تنجح ! كنتي موظفة فشركة و ترقيتي اذن نعستي مع الباطرون ! كنتي موظفة فوزارة و طلعتي رئيسة قسم اذن نعستي مع المدير ! كنتي فشي حزب سياسي و طلعتي و ترقيتي فالمناصب اذن نعستي مع شي ضرسة صحيحة ! مهم ديما نجاح المرأة مرتابط بثقبتها ! و لكن الراجل الى نجح فشي حاجة ديك الساعة بصحتو و راحتو يستاهل و داها و داها و الله اما خلاها ! راجل و نص !
واخا مضيان سياسي محنك و راجل كبير فالسن نورمالمون عندو خبرة فالحياة و طامعين فيه زعما يكون من ديك الطبقة السياسية لي غادفع بالبلاد القدام و غاتخلق المناخ القانوني لحماية حقوق المرأة و فبلاد لي الملك ديالها كايبين بوضوح الاهتمام ديالو الكبير بوضعية المرأة ! واخا هادشي كولو كايبقى دماغ مضيان و دماغ داك بوگرن لي قريت الكومونطير ديالو عامر بنفس الافكار الدونية الخرائية على المرأة هوا هوا !
ايوا طليناه خضر مع هاد الطبقة السياسية ! و الحمد لله بعدا لي عندنا ملك كايدفع بالمرا القدّام أما كون عولنا على مضيان و السياسيين فحال مضيان كورا البعابع لاصورنا شي حق !
Laisser un commentaire