وا ودادية القضاة مزيان تهدرو على اللي كيتاهمو القضاة ويسبوهم ولكن علاش ما هضروش على القاضية العمري اللي حكمو قضاة ضد عائلتها باش تمشي ليهم 150 گطار. راه اكبر اساءة للقضاء هو قاضية تطلب تدخل سيدنا

كود هناء ابو علي ////

هادي قل من سيمانا خرجات الودادية الحسنية للقضاة ببيان على فيديوات وتدوينات فيها اتهامات للقضاة سواء بصفتهم الشخصية المرتبطة بممارستهم المهنية او بسبب انتمائهم الى مؤسسات ذات ارتباط بأدائهم الوظيفي.  

هاد البلاغ اللي توصلات بيه “كود” بحال عدد من الجرائد الكترونية او ورقية٬ اعتبرات الودادية هاد الخرجات “افتراءات كيدية واتهامات مجردة من أي إثبات يعضدها، بل تجاوز ذلك الأمر في العديد من الحالات إلى العبث بأعراض القضاة، بغرض النيل من سمعتهم والمس بشرفهم وتسفيه عملهم، والتشكيك في أداء المؤسسات القضائية”.

وباللي هاد الشي ولى “نهج مقصود”.

لكن البيان نسى او تناسى فيديوات بحال ديال القاضية المتقاعدة مليكة العمري اللي بغاو يستوليو على الأرض ديال باها فبرشيد مساحتها 150 هكتار، بشفعة وهمية وعن طريق القضاء.

القاضية ففيديو نشراتو “كود” وتعاود تنشرو٬ قالت باللي شافت شي حوايج ممفهومينش في الملف، المعروض على محكمة النقض وفي الآن نفسه معروض في إطار إعادة النظر بمحكمة الاستئناف بسطات.  

اسرتها كتاهم مول البارود باللي مورا هاد لفعايل٬ وطلبات تدخل الملك محمد السادس. الأسرة قالت ل”كود” باللي كتحتافظ بدلائل تتبين هاد التدخلات، وتتاطلب بلجنة محايدة تعمل تحقيق باش توقف على هاد الخروقات اللي دارت في ملف عقار تيسوى اليوم أكثر من 60 مليار.

دابا بيان الودادية الحسنية للقضاة كان يكون مزيان بزاف ومقبول كون دار قراءة نقدية. كيفاش قاضية كتعرض للظلم. فقدات الامل فالقضاء. قضاة زملاء ليها هدرو ليها على امور فشي شكل فهاد الملف٬ وبغات تدخل سيدنا. قاضية فقدات الامل فالعدالة اللي هي منها. بغات عدالة سيدنا.

الودادية خاصها تخرج بيان لاحكام بحال اللي هدرات عليه القاضية العمري٬ راهم كيسيئو للقضاة. كيهددو الامن القضائي. كيضربو المغرب وصورتو

إقرأ الخبر من مصدره