كود الرباط//
فيديو تنشر بزاف فمواقع التواصل الاجتماعي خصوصا تطبيق تكتوك والواتساب، كيبان فيه الرابور المغربي طوطو كيضرب الطاسة ويغني، وشاد فيديو جوان.
طوطو اللي عندو جمهور غفير فداخل المغرب وبرا، بان فالفيديو لي كيتنغم فيه بقرعة شراب غالبا ويسكي، تكتب على الفيديو عبارة “بدعم من وزارة الثقافة”.
مصدر بوزارة الثقافة نفى لـ”كود” يكون هاد الحفل تحت إشراف أو تنظيم وزارة الثقافة، مشددا بلي هادا فيديو قديم أولا، ثانيا الوزارة معندهاش علاقة بيه، ثالثا غالب الظن انه كان حفل خاص فشي بواط.
وكان طوطو دار جدل كبير فحفل سهرات الرباط عاصمة الثقافة الافريقية، فاش قال :”بالرجولة عندي مساج باغي ندوزو..سمعني سمعني أنا ماشي مؤثر بالرجولة من قبلكم صفقو على وزارة الثقافة على هادشي لي دارو، بالرجولة، كدري مغربي مقودة عليه وبادي الراب، اول مرة فحياتي وشحال من وزارة دازت، لأول مرة كنطيح على وزارة مقودة ودارو خدمتهم.. وانا معنديش مع لحاس الكابة”.
وزيرة الثقافة الشباب والثقافة والتواصل، قال فلجنة التعليم والثقافة بمجلس النواب، الاثنين لي فات، بلي هادشي لي قال طوطو مكيتحملش مسؤوليتو، وميمكنش يمارس الرقابة على الفنانين.