روبياليس متهم باستخدام صحابو كغطاء لصفقات مشبوهة فالاتحاد الإسباني والتقرب من الحزب الاشتراكي فإسبانيا

كود سبور//

مازال ملف لويس روبياليس الرئيس السابق للاتحاد الإسباني لكرة القدم داير البوز فإسبانيا، وكل مرة كتجبد فيه شي حاجة جديدة، وهاد المرة كشفت المعلومات أن الرئيس السابق كانت عندو علاقات سياسية من المحتمل أنه كان كيحمي راسو بها.

وحسب جريدة “ماركا” الإسبانية، فلويس روبياليس مازال كاين فجمهورية الدومينيكان، وباقي ما رجع لإسبانيا، ومن تماك كيحاول يحل المشاكل اللي عندو والتهم اللي موجهة له من السلطات الإسبانية، ومن بينهما الفساد المالي والتجاري وغسيل الأموال، واستخدام الأصدقاء كغطاء فعمليات مشبوهة، بالإضافة لإصلاحات دتيرانات مشبوهة.

وكشفت الجريدة الإسبانية، أن لويس روبياليس، كيحاول يحل المشاكل ديالو من الدومينيكان وما زربانش باش يرجع لإسبانيا، اللي صادرة فيها مذكرة اعتقال له، وأن التحقيقات اللي فتحتها السلطات الإسبانية كشفت أنه متورط فصفقات مشبوهة دارها الاتحاد الإسباني لكرة القدم بحال عقد نقل فينال السوبر الإسباني للسعودية وصفقة قيمتها 5 ملايين يورو ديال تيران فالباسك ما عندوش شروط ديال الاتحاد الأوروبي، وتضربو الفلوس وگاعما تصلح التيران من طرف شركة مديرها عندو علاقة قرابة بروبياليس رئيس الاتحاد الإسباني.

ووضح نفس المصدر، أن لويس روباليس رئيس الاتحاد الإسباني لكرة القدم، كان ديما ولسنوات قريب من السياسيين فإسبانيا، وبالضبط من الحزب الاشتراكي الإسباني، قبل ما تقطع العلاقة ديالو بهم من ورا المشكل ديال التحرش الجنسي فالمنتخب الإسباني البنات واللي تفركعت فالفينال ديال كأس العام للسيدات، وهي القضية اللي متابع فيها.

إقرأ الخبر من مصدره