كود هند لكلاوي مراكش ///
يتعرض فالقاعات السينمائية المغربية الفيلم الفرنسي “نوڤمبر”. فيلم من بطولة جون دوجاردان واخراج سيدرين خيمينيث وسيناريو اوليفيي دومانجيل.
السيناريو مستمد من الاحداث الارهابية اللي ضربات باريس ف13 نونبر 2015. السيناريست خدم فيه 3 سنين وعاود خدم مع المخرج.
كان تنسيق فهاد الفيلم مع المخابرات الفرنسية كيق قال المخرج نفسو فحوار مع “فرانس انفو”. يعني احداثو اللي مازال حاضرة بقوة ففرانسا حتى اليوم ويالله تحكم على صلاح عبد السلام٬ على احد منفذي هاد العملية٬ بالمؤبد.
اللي كيهم فهاد الفيلم اللي معروض فميگاراما كازا وغيرها من القاعات الوطنية هو الجانب الخاص بالمغرب.
فرانسا بانت مخابراتها مشتثة. تالفة. لا تنسيق لا خدمة مزيانة. باش وقعات الضربات الارهابية ل13 نونبر 2015 ومات 130 باريسي٬ شنات القوات المسلحة الفرنسية غارة فسوريا. اعتقدات المخابرات ان عبد الحميد اباعوض مهندس ضربات باريس٬ تقتل.
بقى البحث. فالفيلم خرجات شخصية صونيا. هادي كانت كتسكن مع حسناء ايت بولحسن اللي من عائلة اباعوض واللي غادية تعاونو. الفيلم بين ان هاد الشخصية هي اللي جات عند البوليس. غير هو شكك فروايتها. هنا غادي يتلقى اتصال من المخابرات المغربية باللي عم اباعوض كاين فهاد لبلاد. شفنا مسؤول من المخابرات الفرنسية جا للمغرب وشاف هاد الفرد. طريقة التصوير غريبة. شفنا طونوبيلات الجيش المغربي او قوات خاصة جات لدارو وروعات مراتو وروعاتو حتى هو وروعات نعاجو.
ثم شفنا هاد الشخص ما باغيش يهدر مع لمغاربة. ما تايق غير فالفرانسيس. وهدر مع المسؤول الفرنسي وتأكد باللي اباعوض راه فاوربا وما تقتلش وباللي كيوجد لعمليات ارهابية اخطر فباريس.
المشكلة ان هاد الشي ماشي منطقي. كيفاش هاد العم او الاب ديال اباعوض اللي عايش مرتاح نواحي اكادير٬ ما تايقش فلمغاربة وباغي يمشي فحالو كاع.
ثم اللي تأكد ان المخابرات المغربية هي اللي عطات معلومة مهمة بزاف على تواجد اباعوض فاوربا وعلى دور حسناء ايت بولحسن. حتى رقمها الفرنسي لمغاربة اللي عطاوه. رئيس الدولة الفرنسية حينها فرانسوا هولاند كان شكر المغرب فاكثر من مرة وتم منح وسام لعبد اللطيف الحموشي مدير المخابرات المغربية. رئيس مخابراتهم حينها كان اتصل٬ بعد عملية الهجوم على شقة فسان دوني واللي تقتل فيها اباعوض وحسنا ايت بولحسن وشي حد ثالث٬ بالحموشي وشكرو على دور المغرب.
غير هو الفيلم عطى رواية اخرى. دور المغرب بسيط وحتى فهاد شوية كان مشوه. قدم دولة فشي شكل.