علي الصافي – كود//
فين وصل برنامج انا مقاول اللي طلقو هاذي قرابة عام رئيس الحكومة، وراهن عليه باش يساهم فحل مشكل البطالة، ويدير ديناميكية فسوق الشغل.
اللي يقدر يجاوب على هاذ السؤال، هي المديرة العامة بالنيابة ديال لانابيك اللي عينها يونس السكوري، شي شهرين دابا في انتظار تعين رسميا فالمجلس الحكومي.
هاذ المديرة كانت تعينات مديرة مركزية للتشغيل الذاتي، وحتا واحد ما سولها على الحصيلة ديالها، و اللي الارقام هي اللي تقدر تجاوب عليها، و الجميع كيعرف وضعية التشغيل اللي متعثرة بزاف، رغم تعدد المبادرات الحكومية وتنوعها، وحرص رئيس الحكومة على تسريع هاذ الورش بالنظر للاهمية ديالو من الناحيتين الاقتصادية و الاجتماعية.
يونس السكوري وعوض إسناد رئيس الحكومة بالاسهام في إنجاح ورش أنا مقاول، اختار أنه يعين مقربة منو، بغض النظر على الاستحقاق و الكفاءة، و النتائج معروفة دابا على مستوى لانابيك، بعد مرور شهرين فقط على تعيينها بالنيابة.
كاين احتقان كبير على مستوى الادارة ، و العلاقة مع مدراء المديريات المركزية و المصالح الخارجية من وكالات جهوية واقليمية، حيث الأولوية ديال المديرة الجديدة هو تثبيت النفوذ ديالها، وضمان ولاء الأطر الإدارية. اما الاداء و المؤشرات ماشي مشكيل، وكل الهم هو المسؤولين يبينوا الولاء ديالهم اكثر من اي حاجة، حيث كل رأسمالها هي هو الولاء للسكوري ومن كثرة معندهاش الثقة فراسها دائما كتبغي تفكر الناس أنها دكتوراة.
هاذيك لانابيك فيها تراكم ديال مشاكيل كثيرة وكبيرة، قبل ما تعين المديرة الحالية و اللي حتا هي ورثت وضع ماشي هو هذاك.
هاذ التراكم ديال المشاكل و التحديات،خاصو تقوية الإطار المؤسساتي، و فتح باب الترشح لجميع المناصب باش الادارة تاخذ احسن مكاين، والوزير يكون محايد وموضوعي وفنفس يحاسب أي مدير جديد بناء تعاقد بأهداف، ماشي يعين اللي بغى دون ضوابط ويدوز وقتو ويمشي بحالو، ويكرر نفس أخطاء البيجيدي و التقدم و الإشتراكية ملي عينو صحابهم على رأس الادارة العامة فجوج ولايات حكومية والنتائج معروفة. حصيلة صفرية وبرامج كثيرة و الوقع والأثر ديالها والو، و السؤال الكبير اللي لسان العاطلين و المهتمين بسوق الشغل هو اشنو كدير لانابيك و لاش كا تصلح كمؤسسة عمومية كتصرط ميزانية كبيرة وتقارير المجلس الاعلى وقفات على اختلالات كبيرة و حتا واحد متحاسب فعهد المدراء السابقين داكشي علاش الموظفين اللي خدمو مع المديرة الجديدة كيقولوا ان المهمة كبر منها و أن السكوري دفع بها للفران بلا ما يعرف واش قادة و لا مقداش.