أنا كون بلاصة الكتّاني نمشي نتخبّى ! غا كايضرب ديك العمامة دسندباد البحري وكاينسى راسو ! انسان كان فالحبس بتهمة الارهاب وسليل عبد الحي الكتاني لي كان مع الاستعمار وبايع بن عرفة ضد فالسلطان محمد الخامس وهاكاك مازال عندو الوقاحة باش يهضر على جريدة گود لي الناس لي فيها جدودهم حاربو الاستعمار!

سهام البارودي – كود//

واحد فحال الحسن الكتَاني نورمالو خاصو يفيق كل صباح و يهز تيليفون و يصور ڤيديو كايعتاذر فيه للمغاربة على الخطابات ديالو الظلامية المتطرفة لي كانت سبب فأحداث سطاش ماي الارهابية لي هزّات البلاد و شتتات أسر كثيرة و مشاو فيها بزّاف ديال الضحايا !

كيفاش مازالة عندو الوقاحة انه ينشر الافكار ديالو الظلامية ؟ و منين جاتو الجرأة باش يوصف جريدة گود انها فحال جريدة السعادة لي كان دايرها الاستعمار ! غير هادي بعدا خاصنا نوقفو عليها باش نفهمو مزيان هاد السيد شنو كايقصد :

-أولا الوصف ديال جريدة گود بالعامّية، و هادشي طبعا حيت جريدة گود كاتكتب بالدارجة، الدارجة لي كايحتاقرها الكتاني و لي كايشبهو ليه، صحاب “أبي” “أمّي” “أحسنت” “الله المستعان” “لله المشتكى” السلفيين و اللحايا لي باغين المغاربة يهضرو لغة ماشي لغتهم ! الكتاني أصلا كبر فالسعودية و تربى فالشرق و قرا و تعلم تمّا، ماكبرش معانا و ماتفرجتش فالرسوم لي تفرجنا فيهم ، نقطع يدي الا كان الكتاني كايسمع للعيطة فحال المغاربة و كايستمتع بالشعبي، هوا الهضرة لي هضرة ماكايهضرهاش فحال المغاربة و باغي قاليك يفتي للمغاربة فكيفاش يعيشو و يقوليهم شنو يديرو و شنو مايديروش ! آ البعابع ! سير تاتكون كاتفهم المغاربة و كاتهضر فحال المغاربة و كاتلبس فحال المغاربة و كاتسمع الموسيقى لي كايسمعو المغاربة و كاتشطح شطيح المغاربة عاد آجي عطي رأيك فالمغاربة !

-ثانيا الوصف ديال الكتاني لگود بالجريدة العامية جاي من الشّوفة لي كايشوف بيها راسو هوا الفوق و گاع الآخرين لتحت، ديك الثنائية ديال “العلماء و العوام ” زعما هوا العالم و گود العوام ! عالم ديالاش ؟! ديال احكام الضراط ! غا لي ضرب شي عمامة د سندباد البحري و شي جلابة كايقوليك انا عالم ! و فاش جات كورونا كنا غانموتو كاملين كونما العلماء الحقيقيين ديال سينوفارم و فايزر و استطرازينيكا خرجو لينا اللقاح ! عالم قاليك !

-ثالتا خاصك بصح مايكونوش عندك المرّاگات لابغيتي توصف جريدة گود بأنها كاتمثل جريدة “السعادة” لي كانت بوق للمستعمر و نتا براسك وسط عائلتك كانو خونة و اذناب د المستعمر و للمثال و ليس الحصر عبد الحي الكتاني لي كان بايع بن عرفة هوا و رباعة ديال الخونة، عبد الحي الكتاني لي فالوقت لي المغاربة كانو كايجاهدو ضد فالمستعمر و كايموتو بالقرطاس كان هوا كاياخد وسام من عند المقيم العام غيوم ! عبد الحي الكتاني لي مات عند احبابو فنيس- فرانسا ! فآخر واحد يهضر على الاستعمار و يجي جيهت الاستعمار غايكون هوا سليل الكتاني !

-و رابعا: باش تكون جريدة گود هي جريدة الاستعمار هادشي كايعني انه المغرب مستعمَر دابا و شكون مستعمرو ؟! شنو كايقصد الكتاني بهاد التدوينة ؟! واش الكراهية لي كانت فجدو عبد الحي الكتاني للسلطان مولاي يوسف امتدت ليه حتى هوا و عندو نفس الحقد اتجاه الاسرة العلوية ؟ ايوا شنو كايقصد بجريدة الاستعمار خاصو يقولينا شكون مستعمر المغرب و يكون راجل و قد كلمتو ! راه الرجلة ماشي فالجلالب و الرزّات ! أنا كون بلاصة الحسن الكتّاني نمشي نتخبّى ! غا كايضرب ديك العمامة د سندباد البحري و كاينسى راسو ! انسان كان فالحبس بتهمة الارهاب و سليل عبد الحي الكتاني لي كان مع الاستعمار و بايع بن عرفة ضد فالسلطان محمد الخامس و هاكاك مازال عندو الوقاحة باش يهضر على جريدة گود لي الناس لي فيها جدودهم حاربو الاستعمار فالوقت لي عبد الحي الكتاني كان كايعلق ليه المقيم العام غيوم وسام جوقة الشرف !

إقرأ الخبر من مصدره