شحال من واحد كبر مع الأم ديالو كتاكل لعصا يوميا من عند باه ومع ذلك بقات مزوجة مقابل السترة والمرقة وبيجامة ديال ستمية وسروال ديال ميتين وستين وجلابة في العام ديال طناشرمية، وحتى هو كيدخل للفايسبوك يكتب بلي الطلاق كثر في المغرب حيت حقوق المرأة هدمات تماسك الأسرة المغربية

محمد سقراط-كود////

واحد البنت نواحي مدينة تازة في منطقة باب بودير بالظبط ، كانت تزوجات زواج البادية كيسميوه صحاب فايسبوك زواج الحشمة والتقاليد وداكشي ديال مك تخطب ليك بلا ماتكون كترف البنت من قبل، للأسف البنت تزوجات واحد الميكروب هو وعائلتو دوزو عليها العذاب وهي باقا صغيرة، وكي العادة مع الزواج مع الولادة والتربية والعصى والمعاملة السيئة ديال النساب، هزات بنتها وجمعات حوايجها ورجعات للدارهم قاتليهم باغا نطلق، ناضت مها -لي كيسميوها منبع الحنان والحنانة والأم مدرسة عظيمة  وأمك أمك أمك ثم أبيك- قاتليها والو والا تبقاي كالسة عندي رجعي لدارك، و أش غادي يقولو عليا الناس وآش غادي يقولوا عليا في القبيلة بنتها طلقات وأنا ماتكلسش عندي مطلقة في الدار وصبري كي صبرت أنا وصبرو بزاف قبل منك وراجل دابا يكبر ويدير عقلو ونسابك دابا يهدهم الزمان، وبقات معاها حتى رجعاتها صحة لدار راجلها، البنت فاش شافت أنها غادي تعيش حياة كلها ديال تازمامارت غير باش تسمى عليها راها مزوجة، غسلات لبنتها وكمداتها حطاتها حداها وطلعات شنقات راسها، وبقات الأم كتحسر أنا لي رديت بنتي وكون عرفتها غادي تودع مانردهاش، ولكن حتى فات فوت، باش أم تودع بنتها رضيعة وتشنق راسها راه ماشي صعيبة ودليل على أنه كان كيدوز عليها العذاب في داك الدار، وبحال هاد الحالات راهم كثار وللأسف كتسمى نتاحرات حيت مسكونة أو سحروا ليها، داروها سحر الكره بينها وبين راجلها، وفي الحقيقة راجلها مجرم أناني حكار مغتصب جبار.

حالات كثيرة كيعرفهم أي واحد فينا ديال عيالات كياكلو القتالي ديال العصا ومع ذلك باقي مزوجين ووالدين وهوما كذلك كيقتلوا ولادهم بالعصى ومكانوش كيطلقوا، واخا عاشوا عيشة كي الخرى عيالات ورجال وأطفال، العصى والمشاكل راه كيأثروا حتى على حيوانات الدار مابقى غير بنادم والمقربين، المرأة المغربية مكانتش كتطلق حيت أصلا المطلقة راه كانت وصمة إجتماعية وعار وعناء كيتعايروا بيه النسا، بالإظافة إلى أن أغلبية العيالات كانوا أميات معندهم لا حرفة لا قراية لا رعاية إجتماعية لا حماية  ودعم من الأسرة كيطلقوا كيلقاو راسهم مشردات في الزنقة، حيت في الوقت لي كان خاص يبنيو مستقبلهم كانوا طالقين الكوكوط  كتصفر كيوجدو المرقة ويتسناو الدراري يرجعوا من المدرسة، هاعلاش أن أرقام الطلاق كانت ناقصة مكتنعنيش أن الأسرة المغربية كانت متماسكة ودابا تفككات، بل العكس كتعني غير أن المرأة المغربية غادا وكتولي بنادم بكامل الحقوق والأهلية وعندها مقدرة ديال أنها تطلق وتبدى حياتها من جديد، هادشي راه كان ترف برجوازي غير متاح للجميع، دابا يمكن حتى مولات المسمن تطلق وتبدل المدينة وتبدى حياتها من جديد بوحدها أو مع راجل أو مرة خرى.

فاش رتافعات معدلات الطلاق في المغرب هذا راه رقم كيفرح أنك تشوف الكوبلات المغاربة نضجوا لدرجة أنهم يطلقوا والا يبقاو عايشين في العذاب والتكرفيص والذل بحال واليديهم، شحال من واحد كبر مع الأم ديالو كتاكل لعصا يوميا من عند باه ومع ذلك بقات مزوجة مقابل السترة والمرقة وبيجامة ديال ستمية وسروال ديال ميتين وستين وجلابة في العام ديال طناشرمية، وحتى هو كيدخل للفايسبوك يكتب بلي الطلاق كثر في المغرب حيت حقوق المرأة هدمات تماسك الأسرة المغربية والعيالات سابوا مالقاوش لي يحكمهم وهو عاش حياتو كلها باه يضرب مو ومو ضربوا هو دار شي حاجة أو مادارش، وفي اللخر يقوليك يكل فخر أن الواليد كان واعر، باش واعر كان حكار ظالم كيحكر على مك ونتا كتشوف وعوض تطلق وتفرق الجوقة بقات عايشة في القهرة وتمارة حتى كبرتي ووليتي تخرى بحال هادي في فايسبوك.

إقرأ الخبر من مصدره