سهام البارودي – كود//
مول الفوقية جاه الاسهال مؤخرا ديال الڤيديوات و اللايڤات و التدوينات و ماشي غير بوحدو لي جاه هاد الاسهال الحاد، بزاف ديال اللحايا و السلفيين ناضو كايديرو شي بهلوانيات زعما زعما باغين يديرو الضغط على الدولة قبل ماتخرج المدونة و مشاو بعيد مول الفوقية مثلا كايهدد فتدوينة بأنه غاتنوض الفوضى فالبلاد و الحرب وواحد المهلوك تاهوا نايض كايهدد بضرب الرقاب !
وا البعابع لي غادّيرو ماشي الضغط ! آ والو والو انا جيت من المستقبل باش نقوليكم بلي ماغادي تصورو تا وزّة ! التعصيب غادي يتحيد و المرا غاتاخد حقوق اكثر فالمدونة الجديدة و غاتكون عندها قرار و دور فعَال فالاسرة ماغاتبقاش مفعول بها ! و ماغاتبقاش تحت السباط و ماغاتبقاش محگورة !
فيقو راه 2024 هادي، العالم كامل غادي فاتجاه اعطاء العيالات حقوقهم، و المغرب جزء من هاد العالم و زايدون حنا عندنا ملك الله يخليه لينا من نهار جا و هوا واقف على هاد الورش ديال المدونة و من نهار جا و الوضعية ديال المرا كاتحسّن !
ماغادي تصورو والو ! واخا تحماقو بالڤيديوات و اللايڤات و البهلوانيات، ماغاتكونش الشريعة و ماغانقطعوش يد السارق و ماغاديش نمنعو المرا انها تزوج راسها براسها !
انا جيت من المستقبل باش نقول لمول الفوقية يوجد شي باقة جديدة تكون سميتها باقة تعصيب حيت ماغايبقاش و تكون مخلطة آملو و أرگان و الله تاناخدها من عندو واخا منتوجاتو ماعندهاش الطابع ديال لونصا و كاتصايب فالگاراج و مسميا بيو بلا مانعرفو كيفاش هاد بيو ؟ بيو فأوروبا راه طابع كاتعطيه ليك مؤسسة متخصصة ماشي غير كاتجي و طبعو فالتيكيتة و لكن هانية ! ماعلينا ! نهار توجد باقة تعصيب انا غاناخد منها !
و غاتجي المدونة و غاتكون بشرى خير للعيالات فالمغرب و غاطرطق شي عرق لللحايا ! و طبعا كانحب نطمئن مول الفوقية بلي ماغاتكون لا فوضى لا حرب حيت المغاربة ماشي حومَاق ! المغاربة بعقلهم و عارفين ما لهم و ما عليهم و غايتجوجو و غايديرو العراسات و ربعة دجاجات فالطبسيل و بسطيلة د الحوت و غايعيطو على الشيخات يشطحو !
راه المغرب هذا آ سّي مول الفوقية ماشي داركم فالدرارگة! واش يصحابك المغاربة حمّاق ؟!
Laisser un commentaire