كود سعيد الشاوي///
دابا رجع النقاش حول دعم الصحف. كلشي باغي ياخد لفلوس من الدولة. هاد الدعم كيبان لي تخربيقة. ضد هاد الدعم. واش عمر شي دراسة دارت على سنوات الدعم؟ والو. ولكن اجيو نكونو واضحين. راه هاد الدعم ما قوى صحف ما قوى توزيع ما قوى نشر. ما حسن وضعية الصحافيين والعاملين فالقطاع. عايشين عيشة الدبانة فالبطانة.
اللي بان عليه هاد الدعم ونقولوها بصراحة شي شي ناشرين. عينة قليلة بزاف ولكن بان عليها الدعم. تصورو صحف ومجلات ومنشورات لمغاربة ما كيعرفوهاش. التوزيع والو. الانتشار زيرو وماليات وماليين هاد المنشورات ساكنات وساكنين فڤيلات وكيتحركو فطونوبيلات ارخص وحدة ب50 مليون.
واخا هادو عينة قليلة بزاف ولكن كافية باش هاد الدعم كيف كاين خاصو يتوقف. دابا كان اجتماع لوزير الاتصال والثقافة مع الجمعية الوطنية للاعلام والناشرين وفيدرالية الناشرين المغاربة. تجبد هاد الموضوع. طبعا كل واحد من زاويتو.
دابا هاد الدعم خاصو يتقبر. ايلى بغاو الصحف والمجلات ياخدوه يرسلو المجلس الاعلى للحسابات يدير تدقيق على طرق صرف هاد الدعم من قبل جميع الصحف من نهار بدا. من بعد يغيروه.
اللي خاص هو صندوق استثماري يدعم المقاولة وفق مشاريع محددة. الشركة الناشرة تاخد كريدي وترجعو بنسبة معقولة باش تحرك القضية ولكن يكون عندها مشروع واضح باهداف واضحة.
الدولة ايلى كانت عندها رغبة تهلى فالصحافيين راه ساهلة. خاص الدولة تتدخل وتحدد للشركات العمومية اولا ثم الشركات المغربية الخاصة نسبة مئوية للاشهار عند العمالقة بحال فايسبوك وكوكل …باش الاشهار يتوزع بين الصحف واللوحات الاشهارية والقنوات التلفزيونية والاذاعات الخاصة…
هادي فكرة من عشرات الافكار باش الدولة تتخلى على هاد الدعم اللي عطات فيه ملايين بطريقة غريبة لصحف لشركات الطباعة لشركات التوزيع واخا ما بقى توزيع.
الدعم ديال هاداك تعطيه 200 مليون ولاخر 400 مليون راه فضيحة كبيرة وخاصها تولي من الماضي