صورة العار. شكون يتحاسب على صورة وزير الحسن الثاني محمد زيان دارين بيه الجدارمية وعلاش بلادنا للي مرأسة مجلس حقوق الإنسان ما قادراتش تعالج ملفات النقيب والصحافيين

كود سعاد زرار ///

صورة محمد زيان النقيب والمحامي ووزير حقوق الانسان ايام الحسن الثاني٬ ول البارح الاثنين 20 ماي 2024 وهو خارج من محكمة الاستئناف بالرباط صورة مقودة. صورة العار. شوهة كضرب لبلاد. صورة لرجل دايرين بيه الجدارمية عمرو 81 عام. قبل كلشي نوضعوكم فالسياق. سياق هاد المحاكمة وسياق العقوبة الحبسية اللي كيدوزها. 
نبداو بسياق هاد المحاكمة: محمد زيان جا يمثل امام الغرفة الابتدائية بمحكمة الاستئناف بالرباط، بتهمة عدم ارجاع مستحقات الى خزينة الدولة. هادي غير قضية من قضايا اخرى. هاد القضية تأجلات ل14 يونيو 2024. 

اما سياق وجودو فالسجن فعندو علاقة بقضايا اخرى. قبل هاد الشي كان زيان تحكم عليه ف23 فبراير 2022 ابتدائيا ب3 سنوات وايدات محكمة الاستيناف الحكمة وتعتاقل ف21 نونبر 2022. القضية بدات بعد ما توجه للنقيب السابق ووزير الحسن الثاني فالتسعينات ف30 نونبر 2021 11 تهمة من قبل وزارة الداخلية: “إهانة هيآت منظمة” و”نشر أقوال بقصد التأثير على قرارات رجال القضاء” و”بث إدعاءات ووقائع كاذبة ضد إمرأة بسبب جنسها” و”بث إدعاءات ووقائع كاذبة بقصد التشهير بالأشخاص عن طريق الأنظمة المعلوماتية” و”التحريض على خرق تدابير الطوارىء الصحية “ايامات كورونا” عن طريق أقوال منشورة على دعامة إلكترونية ” و”المشاركة في الخيانة الزوجية” و”المشاركة في إعطاء القدوة السيئة للأطفال نتيجة سوء السلوك” و” المشاركة في مغادة شخص للتراب الوطني بصفة سرية” و”تهريب مجرم من البحث ومساعدته على الهروب”، و”التحرش الجنسي”.
 
اعتقال زيان الرجل الثمانيني ثم الحكم عليه كان خلق انتقادات حقوقية. فدجنبر 2022 كانت منظمات حقوقية منها “منا لحقوق الانسان” اللي مقرها جنيف٬ عتابرات “أحدث مثال على الاستخدام المتزايد من قبل السلطات المغربية لتهم جنائية غير متعلقة بالتعبير لمحاكمة النقاد البارزين، مثل تهم ترتبط في غسيل الأموال، والتجسس، والاغتصاب والاعتداء الجنسي، والاتجار بالبشر”.
صورتو الاثنين للي داز خرجات على القضية اللي بدات تنسى عند الرأي العام المغربي. صورة العار هاديك فيها استفزاز. كيفاش يخرج رجل بداك السن سواء كان زيان او اي مواطن من المحكمة حتى للشارع وداير بين الجدرامية والقوات العمومية عاد يركب فصطافيط باش يرجع للحبس. علاش واش ما كايناش طونوبيلة تنزل للباركين مباشرة. هادي مسؤولية القضاء ماشي شي جهاز اخر. القضاء هو اللي جابو وخاصو يضمن ظروف محاكمتو بما فيها تنقلو من الحبس للمحكمة.هاداك الميز اون سان مستفز بزاف. مجاني. كان ممكن نتفاداوه. 

زيان بلاصتو ماشي فالحبس. زيان جزء من النظام المغربي ماشي معارض ليه. كيعارض جزء من هاد النظام ماشي كلشي. قدم خدمات لهاد النظام. اعتقالو ثم تبدلتو بهاديك الطريقة ما غادي يضر الا النظام. 

المغرب كان يستغل 2024 حقاش اول مرج انتخب ف10 يناير 2024 فجنيب لرئاسة مجلس حقوق الإنسان التابع للأمم المتحدة لسنة 2024. سنة خاصو يقطع مع امور كثيرة. رئيسة المجلس الوطني لحقوق الإنسان، السيدة آمنة بوعياش، كانت وصفات ديك الساعة انتخاب المغرب “بالتاريخي”  معتبرة ذلك “تتويجا لمسار انخرط فيه المغرب منذ أكثر من 20 سنة، من أجل إحقاق الحقوق على المستوى الوطني. وخاصها تنوض تخدم وتلقي الحلول لقضايا بحال زيان والصحافيين بوعشرين توفيق وسليمان الريسوني وعمر الراضي وناس حراك الريف ….

خاص المغرب يطوي هاد الملفات وما تبقاش تتكرر صورة رجل ثمانيني منهوك مهلوك تعبان داير بيه الجدارمية

إقرأ الخبر من مصدره