سهام البارودي ـ كود//
قاليك باغين يديرو نداء لسيدنا باش يوقف موازين! شوف مساكن شحال هبّال هاد اللحايا لي بلانا بيهم الله فالمغرب.
مهرجان موازين كايتم تحت الرعاية السامية د سيدنا، راعي الفن والفنانين ومحب الراي والموسيقى الشبابية، وفالرباط العاصمة د المغرب، ومهرجان كبير كايستقبل ألمع النجوم فالعالم لي باش تشوفهم لايڤ خاصك تكون ساكن فلوص أنجلس ولا باريس ولا طوكيو! موازين لي كايشكل فرصة للمغربي لامدا باش تاهوا يشوف نجوم كبار وطنيين ودوليين ويتصنط ليهم ويشطح على موسيقاهم! باغين يحبسوه اللحايا! وباش دايرين السبة؟! قاليك بفلسطين !
فحالا حنا ماعارفينش بلي من ديما موازين واحل ليهم فالقرجوطة، قبل كورونا وقبل فلسطين وقبل حتى ظهور السترينگ، اللحايا ماعمرهم حملو شي حاجة سميتها الفن والموسيقى والنشاط! أصلا هوما كايجيهم هادشي فسق وفجور وماكرهوش يطمسو لينا الهوية المغربية ديالنا لي عامرة بالموسيقى والجمال (أحواش، أحيدوس، الطقطوقة، العيطة…) المغربي بطبعه عاشق للفن! وبغاو هاد اللحايا يجيو ويحرموه منّو !
ولكن البعابع لي غادي يصورو! موازين غايكون وغايمشيو ليه المغاربة باش يشطحو ويفوجو قبل مايطرطق فيهم شي عرق! راه المغربي محتاج اليوم اكثر من أي وقت مضى أنه يفوج على راسو والدليل هوا أنه التيكيات بداو كايتباعو بسرعة وشي وحدين صافي سالاو فحال ديال كارول سماحة تبغيه للدوا ماتلقاهش !
وكيما العادة غاينتاصر الفن على البكائيات ديال اللحايا.
Laisser un commentaire