سهام البارودي- كود//
المغرب دولة عندها سيادة و القرارات ديالها ماكاتاخدهمش من الهاشطاگات و ڤيديوات الفايسبوك و تيك طوك و لحسن الحظ حيت كون كانت القضية هاكا كورا خرانا مايجمعوه شراوط مع شي حمّاق و مسطيين و ظلاميين منتاشرين فالسوشل ميديا ! بالنسبة الفلسطينيين لي دارو فيديو كايدعيو فيه لإلغاء موازين يمشيو يدخلو سوق راسهم و يديوها فالجيهة ضّاراهم ! راه ماشي غي حيت فلسطينيين وحيت عندهم الحرب صافي غادي يلبسونا بالمقلوب ! راه الامارات و السعودية و مصر و الاردن عامرين مهرجانات و حفلات و ماكايدوي معاهم حد ! واش يصحابهم المغرب حويط قصير ؟!هادي راه سميتها الضسارة و البسالة انه مواطنين دولة اجنبية يتدخلو فالحياة دمواطنين د دولة اخرى غا حيت سوا ديزون كايجمعهم الدين و لا الهوية ! آ دخلو سوق راسكم الله يرضي عليكم. دخلو سوق ر ا س ك م باش مانقولوش ليكم شي كلمة اخرى.
و لكن العيب ماشي فدوك الفلسطينيين، العيب فالخوامجية ديالنا لي قالو ليهم يديرو ڤيديو يطلبو بيه بإلغاء موازين، شوف قمة الخساسة و الدناءة و الندالة، الخوانجي عوض انه يخلي النقاش داخلي و يخرج معاك راجل لراجل، مغربي لمغربي، لا غادي كايعيط لمواطنين دولة اجنبية باش يعاونوه ! غا باش تعرف دينمهم شحال حمّاق و شحال ماعندهم ادنى اعتبار للدولة ديالهم و السيادة ديالها ! واحد جوج عيطو للفلسطينيين يطالبو بإلغاء موازين ! باغي يتحامى بالفلسطينيين و يلعب على العاطفة بديك الهضرة ديال ” لاترقصوا على دمائنا” مالنا ؟! دايرين الفيجطة فتل أبيب ؟!
راه موازين مهرجان كايتنظم تحت الرعاية السامية لسيدنا و كايحضروا فيه المغاربة و كايفوجو فيه المغاربة و كايشطحو فيه المغاربة و كايفرحو فيه المغاربة و حتى واحد ماسوقو فينا!