مبقا عندنا ما نديرو بغاز الجزائر.. رويترز: المغرب غادي لونصي بروجي ديال الغاز الطبيعي في ميناء الناظور هاد الصيف

كود عن رويترز///

المغرب غادي وكيسرع فاستراتيجية الغاز، وكينفاتح على أسواق جديدة، حسب ما كشفت عنه وزارة الانتقال الطاقي والتنمية المستدامة.

الهدف طبعا، هو أن بلادنا باغيا تقلص من انبعاثات الكاربون، لذلك خاصو الغاز بالإضافة إلى الطاقات المتجددة باش ينقص من نسبة الفحم في الإنتاج الكهربائي.

لهذا الغرض، وزارة بنعلي بغات تسربي وتسرع من إنجاز محطة استيراد الغاز فالناظور.

ونقلت رويترز عن مسؤول في الوزارة أن طلب عروض غادي اتلونصا في الصيف باش ف2025 يكون الإغلاق المالي للمشروع وتبدا الخدمة 2026.

هاد المحطة ديال استيراد الغاز مهمة أولا لأنها غادي تكون بنية تحتية عائمة بحال الدول المتقدمة وغادي تخلي المغرب ايجيب الغاز الطبيعي المسال وإعادة تغويزه في ميناء الناظور ويست ميد.

ومن المرتقب ربط هذا الميناء بأنبوب لي كايجيب لينا الغاز انطلاقا من محطات الاستيراد الإسبانية.

المغرب كايشوف أن الحاجيات ديال الصناعة والإنتاج الكهربائي غادي تزاد من 1 إلى 8 مليار متر مكعب في 2027. يعني مابقاش الوقت بزاف وخاص بنية تحتية مغربية للاستيراد في المستوى في انتظار دخول الغاز الطبيعي المنتج داخليا على الخط ولي يقدر ب قدرة إنتاجية ديال 1.5 مليار متر مكعب سنويا على اقصى تقدير.

الجزائر حبسات علينا الغاز وكاتمنا تشوف الضو مقطوع في المغرب ولكن المغرب قاليها لي عندو باب واحد الله اسدو عليه.

هاد تقنية ديال تغويز غادي تخلي المغرب انفاتح على أسواق عدة ديال الغاز واقلل من الاعتماد على الجيران بما فيهم إسبانيا!

إقرأ الخبر من مصدره