كيفاش غادي يدوز ليكم العيد الكبير وقلوبكم مع غزة وبطونكم وعقلكم مع بولفاف كيفاش غادي تشوط الراس وتجبد المخ وتديرو مع مطيشة والبيض وتعمر الطيحان وتخبي القلب على ولادك بدعوى كيكحل الوجه وخوتنا كيموتوا في فلسطين عوض المطالبة بإلغاء موازين راه المنطقي هو الغاء العيد الكبير تضامنا ولا هادي متقدروش عليها.

محمد سقراط-كود///

المغرب عامر مهرجانات ومواسم ها موسم رگراگة ها موسم مولاي عبد الله ها موسم الحمير ها مهرجان صفرو مهرجان آسفي للعيطة، كل قبيلة ومدينة إلا وعندها موسم ومهرجان ديالها، ومع ذلك ديما اللغط كينوض غير على موازين ومن جميع الاتجاهات والتيارات االسياسية والدينية، بغاو يتضامنو مع غزة كيطالبوا بإلغاء موازين بغاو يطالبو بسبيطار وجامعة كيطالبو بإلغاء موازين، بحال إلى موازين هو لي معرقل المسار الديمقراطي في المغرب والتنمية والمشاريع الكبرى وهو راه غير مهرجان ديال الموسيقى كينشط الشعب وكيعطي إشعاع للبلاد.

هاد العام تلاقى موازين مع حرب غزة وطبعا أول مطلب حاليا ماشي هو وقف الحرب في غزة ولكن إلغاء موازين في المغرب، آش جاب شي لشي الله واعلم، المهم أي حاجة وقعات خاص إلغاء موازين ك، بدعوى كيفاش غادي يحلى ليكم الشطيح والرديح وخوتكم كيموتوا في غزة، حقا ما يحدث في غزة كارثة إنسانية ولكن هذا مكيوقفش الحياة في العالم، راه هادو نيت صحاب قلوبنا مع غزة راه عقولهم وبطونهم مع بولفاف والحولي والشوا والصردي والفاخر والمجامر.

واش بقات غير في موازين كيفاش غادي يدوز ليكم العيد الكبير وخوتنا كيموتوا في غزة كيفاش غادي يدوز ليك بولفاف مع كاس ديال اتاي منعنع والحرب مازالة في غزة، كيفاش غادي تشوط الراس وتجبد المخ وتديرو مع مطيشة والبيض وتعمر الطيحان وتخبي القلب على ولادك بدعوى كيكحل الوجه وخوتنا كيموتوا في فلسطين، كيفاش غادي يعطيك خاطرك تشري حولي صردي بنص مليون على الأقل وتعزل وتختار في رحبة البهايم وخوتنا في فلسطين مالقاو مياكلوا، راه المنطقي عوض المطالبة بإلغاء موازين تضامنا مع غزة خاص المطالبة بإلغاء العيد الكبير حيت هو لي عيد بصح وغادي يكونوا المغاربة كلهم فرحانين في وقت واحد واخا خوتنا كيموتوا في فلسطين، أما موازين مهرجان خاص بمدينة وفئة معينة من الناس علاش باغين تفرضوا عليهم يحزنوا معاكم بطريقتكم.

إقرأ الخبر من مصدره