مال المغاربة ولاو خفاف ؟ لي عندو شي خدمة ينوض يخدمها و لي عندو شي امتحان ينوض يوجّد ليه و لي تابعو الباك يبريباري و لي ماكايجيوهاش الخطّاب ضرب الفگد فراسها و لي مريض يمشي للطبيب راه ماكاين لا ربعين “دعوة” الغريب مستجابة لا حتى زفتة ! يصحابكم الحياة الساهلة غا جمع ربعين واحد من فايسبوك و كلشي غايتحقق ليك

سهام البارودي – كود//

عافاكم آ خوتي دعيو معايا عندي الباك راه قاليك “دعوة” ربعين غريب مستجابة! هاي هاي هاي شي مغاربة حنان يصحابهم الحياة ساهلة ماهلة غي جمع ربعين غريب من الفايسبوك و لا انستاغرام يدعيو معاك و راه صافي غايتقضى ليك الغرض ! غاتنجح فالامتحان، و غاتجوجي، و غاتبراي من المرض و ولدك غايخدم و راجلك غايدخل سوق راسو هادشي كامل باش ؟ بربعين دعوة الغريب !

هاد الظاهرة الجديدة ديال ربعين دعوة الغريب نتاشرات بشكل كبير فالسنوات الاخيرة.

بنادم باغي يقضي الغرض، لا مجهود، لا فلوس، لا تامارا… شوف على ثقافة كي دايرة ! بنادم باغيها ساهلة و متيق انها ممكن تجيه بطريقة ساهلة.

آ و الله ماقفلتي لا فورتي، فالحياة بصفة عامّة، لاماقريتيش ماغاديش تنجح و لامادمرتيش ماغاديش تصور الفلوس، و لا كنتي مريض راه العلاج فالسبيطارات، و لا ماكاتزوجيش و ماكايجيوش فيك الخطاب راه حيت كاين شي مشكل فيك و لا فالمحيط ديالك و لا حيت گاع لي كايشوفوك مامهتمينش يتجوجو بوحدة فحالك.

إقرأ الخبر من مصدره