مدينة هرمومو كانت خربة منسية حتى نتاخبو سكانها شاب ولد المنطقة ودار انقلاب حقيقي فيها.. الطرقان تصلحو، الواد الحار دخل لاحياء عمرها حلمات بيه.. في المقابل جماعات كثيرة صوتوا على شفارة نصابة أميين هرگاوة جيعانين، في اللخر كيلومو الدولة واخنوش في سوء حالتهم، والدولة راه عطاتهم فرصة ينتاخبو لي يصلح ليهم ولكن باعو نفسهم بسبب جهلهم

محمد سقراط-كود///

هرمومو مدينة صغيرة جات وسط اجمل المناظر الطبيعية في المغرب، دايرة بالعيون والويدان وكيطيح فيها الثلج وقبالتها بويبلان، عند المغاربة مشهورة بقصة الانقلاب ديال الصخيرات حيت عبابو انطالق منها وكان على رأس المدرسة العسكرية لي فيها، في وقت الاستعمار كانت جنة للمعمرين دايرين الفيرمات فيها وعايشين الحلم النابليوني، او مرة مشيت ليها فشي 2017 واقيلة، لقيتها مدينة خارج التاريخ بحال الى توقف فيها الزمن من ورا الانقلاب بشهر، الطرقان مخربين المدينة مقتولة والطرقان مخربين من جميع الاتجاهات، وفاش كتسول مالها على هاد الحالة كيجاوبوك راها معاقبة منذ الانقلاب الفاشل، بحال الى هرمومو هي لي شدات الطريق بالليل وصبحات في الصخيرات، هرمومو كانت فيها مدرسة عسكرية فيها التلاميذ من المغرب كامل كيقراو تم وهوما لي دارو محاولة الانقلاب ماشي المدينة، وهاد الاشاعة كانت كتقال على أي مدينة يسيرها مسؤولين فاسدين ناهبين للميزانية، مال القصر الكبير بحال شي دوار وهو مدينة عريقة” حگا و الواد راه دارو انتفاظة ضد الدولة” اما قصة الملك زارهم ولاحو عليه مطيشة وغضب عليهم هاديك كتسمعها على فاس ومكناس وطنجة واي قنت كان داك الوقت مخرب مهمل منسي غارق في الفساد وهو راه المغرب كلو كان هكاك داك الوقت من غير السطات وافران ومراكش شي شوية.

ساكنة هرمومو نتاخبوا واحد الشاب في الانتخابات اللخرة وهو لي كيسير شؤون المدينة حاليا، حقيقة دار انقلاب حقيقي على الوضع لي كان قبل منو وغير من معالم المدينة وحسنها ورفع من جودة العيش فيها عبر مشاريع ديال التهيئة الكثيرة لي طلق وعبر التواصل ديالو في فايسبوك، الطرقان غادين وكيتقادو من بعد مكانت خربة كييرة تدارو جريدات وكراسا عمومية قرب الشاطو تصلح مزيان وتنقى، كينقاش كل جديد مع سكان المدينة ومن نهار طلع بدى في اطلاق المشاريع وحاليا الخريطة الطرقية غادا وكتعزز وتجهز في المدينة، احياء مكانش عندهم الواد الحار وصلهم وكل مرة مشروع جديد وبين بلي المنتخب راه عندو الامكانية والسلطة والقدرة على تغيير الواقع ديال الجماعة ديالو في حالة كانت عندو غيرة على المنطقة، وان هاديك الهدرة ديال مدينة ساهطين عليها كانت غير دريعة للفساد والنهب والتسيير العيان ديال المجالس لي دارت قبل.

في المقابل جماعات كثيرة صوتوا على شفارة نصابة أميين هرگاوة جيعانين، غير كيوصلو للمجلس ويبداو في النهب وتفراق الخدامي والطوموبيلات والمارشيات وكتدوز سنوات وكيعاودوا ينجحوا واخا معروفين بالفساد، وفي اللخر كتسول شي مواطن من تم كيبدى يلوم الدولة واخنوش في سوء حالته، والدولة راه عطاتو فرصة ينتاخب لي يصلح ليه ولكنه باع نفسه بسبب جهله، أول حاجة خاص يتعلموا المغاربة هو يحتجوا ويلوموا المجالس المنتخبة ويتحاسبوا معاها، خاص نوليو نشوفوا اشكال احتجاجية على المنتخبين الفاسدين ولي مكيديروش خدمتهم وكيعطلوا قطار التنمية، راه هاداك المجلس الجماعي هو الدولة منتخبة هو لي خاص تلوم وتحاسب معاه قبل من أي واحد، مادام ان شاب قدر يحول مدينة منسية من خربة خارج التاريخ لمدينة فيها شروط العيش راه يمكن يتدار هادشي في أي جماعة في المغرب خاص غير المواطنين يصوتوا على الرجل المناسب.

إقرأ الخبر من مصدره