اعتذار زياش والنصيري من الركراكي مزيان.. لكن واش ماشي أحسن يخرجو يطلبو المسامحة قدام الجمهور؟ 

كود سبور//

طلب كل من حكيم زياش ويوسف النصيري الاعتذار من الناخب الوطني وليد الركراكي، بعدما حيحو عليه ملي شونجاهم فماتش المنتخب المغربي وزامبيا الاحد الماضي، ضمن الجولة 3 من إقصائيات كاس العالم 2026.

ومشى كل من حكيم زياش ويوسف النصيري عند الناخب الوطني وليد الركراكي خلال التواجد ديالهم فلوطيل اللي گالسين فيه فأكادير حسب مصادر مطلعة، وطلبو منو المسامحة على السلوك ديالهم الخارج على الروح الرياضية والاحترام، بعدما شونجاهم فالشوط الثاني ضد زامبيا وناض زياش ضرب صباطو مع الأرض والنصيري ضرب قرعة الما برجليه طوعها، احتجاجا حيث خرجهم.

طبعا الاعتذار على الغلط مزيان، وخطوة مزيانة ان حكيم زياش ويوسف النصيري مشاو عند الناخب الوطني وليد الركراكي وطلبو منو المسامحة بينهم وبينو، وكانت غاتكون خطوة كافية كون الواقعة وقعة فالتداريب، ولكن السلوك اللي دارو كان امام أنظار الجمهور وكل من كان كيتابع الماتش فالتيران او فالتلفزة، والأجدر باللاعبين بجوج هو يطلبو الاعتذار قدام كلشي فتصريح على موقع الجامعة الملكية المغربية لكرة القدم، أو على الأقل ينشرو اعتذار على الحسابات ديالهم فمواقع التواصل الاجتماعي ويطلبو منو المسامحة قدام العالم كيفما حيحو عليه قدام العالم، مع العلم انه دافع عليه هما بجوج بالضبط فمراحل كانت صعيبة عليهم وكانو كيتعرضو فيها لانتقادات كثيرة ووقف معهم ودافع على التواجد ديالهم بجوج فالمنتخب.

إقرأ الخبر من مصدره