زيد الشحمة فظهر المعلوف: حوالا د العيد كتوزع فالبرلمان واحتمال كبير يكونو موظفين أشباح استفدو منها

كود الرباط///

فالوقت للي جيوب المواطنين كتشوط بالعافية للي شاعلة فأثمان أكباش عيد الأضحى، بدا عاود ثاني توزيع البونات والمنح ديال الحوالا فالبرلمان.

ما يناهز 1000 موظف فالبرلمان بمجلسيه تلقاو 5 آلاف درهم كمنحة استثنائية خاصة بكبش العيد، وهاد المنحة تعطات مباشرة من ميزانية البرلمان بقرار من مكتبي المجلسين.

هاد المنحة، للي كانت تدارت سنوات هادي، وكانت فيها 1500 درهم، دابا وصلات لـ5000 درهم.

هاد المنحة كتصرفها جمعيتي الأعمال الإجتماعية في كلا المجلسين: مجلس النواب ومجلس المستشارين. وهاد الجمعيتين تزاد ليهم مؤخرا فالميزانية السنوية وللي كياخدوا فيها الموظفين منح ديال الدخول المدرسي، وبطاقات التنقل بالطوبيس والطرام والتران، ومنح التخييم فالعطلة الصيفية، وكاين للي كيستافد من بونات المازوط لاستعماله فالسيارة الخاصة، ومستقبلا غادين يحصلو على بونات ديال بقع أرضية فودادية سكنية خاصة. هاد الشي كولو والصالير مشحم مزيان وزايد فيه 4 منح سنويا كتوصل عند بعض المسؤولين ل 14 مليون سنتيم فكل 3 أشهر.

“كود” للي جمعات هاد المعطيات فزيارات متكررة للبرلمان، لاحظات غياب كبير للموظفين عن العمل، وواخا المسؤولين عياو ما ينفيو وجود موظفين أشباح، لكن حقيقة غياب هاد الموظفين واضحة للعيان لاحقاش أغلب المسؤولين الإداريين فالفرق هم قياديين فالاحزاب ديالهم. شكون قادر يحاسبهم؟

إقرأ الخبر من مصدره