احمد الطيب – كود الرباط//
علمت “كود” من مسؤول من الجمعية المنظمة لمهرجان موازين، بلي تباعو كثر من 85 في المائة التذاكر وبطائق ولوج حفلات الدورة التاسعة عشرة لمهرجان موازين-إيقاعات العالم لي غاتكون ايام من 21-29 يونيو 2024.
المصدر نفسه قال لـ”كود” :”كاين اقبال كبير هاد السنة وهادشي كيرجع للتنظيم الجيد والأثمان المناسبة باش الاغلبية يشريو التذاكر”.
هاد الرقم ديال 85 فالمائة من التذاكر تباعو، كيعني ان المغاربة عزيز عليهم النشاط وباغين يفوجو، عكس ما يروجه بعض “مداويخ” الفايسبوك ورواد خطاب المقاطعة للي اغلبهم اسلاميين وللي استغلو الحرب ف غزة باش يطالبو بالغاء موازين.
هاد الرقم كذلك مساج لزعيم الاسلامين فالمغرب عبد الاله بنكيران، اللي طالب بالغاء موازين هاد العام بسباب استمرار الحرب ففلسطين. هادو مكتهمش الحرب هادو ضد الفن وصافي وكيتجاهلو بلعاني ان الفن هو أقوى وسيلة تعرفات به قضية فلسطين وكانو فنانو وممثلين كبار فمهرجان كثيرة مؤخرا تضامنو مع غزة ضد الالة الحربية الاسرائيلية. هادوك اللي جايين لموازين راهم مع الفلسطينيين وضد ما يتعرضو له
Laisser un commentaire