نعم مع منع الكوفية الفلسطينية او غيرها فحفلات التخرج واللي دارو عميد جامعة بنمسيك فكازا دفاعا على العقل باش غدا ما يهزوش الطلبة رايات الشيعة او داعش او المسيحية. راه فبلاد كلشي مع فلسطين علاش يسمح لطالبة تخرق الاعراف وتزايد على لخراين 

كود سعاد زرار كازا ///

نايضة حملة ادانة كبيرة ضد عميد كلية العلوم بنمسيك بالدار البيضاء على الفيديو اللي رفض فيه يعطي شهادة لطالبة جات للجامعة ماشي باللباس ديال التخرج بل زادت عليه الكوفية الفلسطينية. طبعا العميد رفض. العميد خدم بالعقل ماشي بالعاطفة بحال عدد كبير من لمغاربة. كلشي ولى كيربح فهاد العميد وكيردد “اخطأ التقدير” وفسنها خاص يكون موقف “انساني مناضل” وشي وحدين بقى ليهم غير يعلقوه. شي جامعيين اغبياء بداو يزايدو بالقضية الفلسطينية وباش كتكون القضية الاولى للمغاربة اللي هي قضية الصحرا كيضربو الطم. 

المهم شرملو العميد فالفضاء الازرق. ما كنهدروش على الاسلاميين ودوك القومجيين اللي كيفضلو المشرق على بلادهم. اللي كيعتاقدو باللي الوطن المغرب بحدودو الحالية ما خاصهاش تكون وخاصنا نكونو تابعين للمشرق باسم الوحدة 

نرجعو لفيديو العميد. اش دار؟ فحفل التخرج اللي حضر ليه بغى يعطي شهادة التخرج. جاي فرحان يشارك الطلبة والاساتذة هاد اللحظة الزوينة فمسار كل طالب طالبة. لكن هاد الحفل عندو طقوسو. عندو كود ديالو. لبسة وطربوش وشال. حتى الالوان فيها صرامة. فباش يشوف عميد كلية شي طالبة ما حتارماتش هاد الطقوس كلها راه عين العقل هو يرفض يعطيها الديبلوم. 

العميد حريص علي كل التفاصيل. شاف شي زيف او درة خارجة على اللي مسموح بيه فحفلات التخرج وهو يتراجع. هادا خاصو احتفاء ماشي اعدام كيف كيديرو ليه شي وحدين اليوم. 

نبقاو غير فالشكل والبروتوكول. العميد حريض عليه لانو عارف باللي تكسيرو عندو نتائج خطيرة. لنفرض الطالبة اللي بعد هاديك الطالبة طلعات غير براية امازيغ شمال افريقيا الزوينة٬ كون الاسلاميين والقوميين اللي كيسبو العميد٬ خرجو كيساندوه. كنهدرو على راية داخلة فمكونات هويتنا المغربية ماشي كوفية دخيلة علينا. هاد الشي بلا ما نهدرو على قضايا عادلة بحال الدفاع على الاقليات فالمجتمع٬ دينية كانت او غيرها. تصورو طالب مغربي ختار المسيحية او شي مذهب شيعي وطلع حتى هو براية المذهب ديالو لحفل التخرج وشوفو اش غادي يوقع

طبعا كاينة نقطة اخرى ماشي بروطوكولية٬ هاد الطالبة اش من رسالة بغات دوز باش باغية تاخد ديبلومها وهي لابسة الكوفية؟ باللي متضامنة مع فلسطين. هاذا تقليد غبي متخلف اللي وقع ففرانسا وجامعات غربية. هادوك موضوع التضامن مع فلسطين داير نقاش كبير. قسم كبير فالنخبة مع اسرائيل وضد كل ما هو فلسطيني. طلبة كيلبسو الكوفية كيكون عندو معنى. شكل من اشكال التضامن مع القضية ولكن بشكل اكبر رفض الموقف السائد.

فالمغرب القضية ما مطروحاش. السياسة الرسمية للدولة المغربية مساندة لفلسطين. كاين تضامن للشعب المغربي معاها. راه كلشي للي فالقاعة بما فيهم العميد مساند للقضية٬ علاش شي طالبة تزايد بهاد الشي. طبعا تصرف العميد كان عقلاني. خاص اي عميد فجامعة مغربية يتصرف بديك الطريقة. اللي كيدير الكوفية راه كيزايد وصافي بحال دوك لملايرية اللي مشاو للصويرة ودايرين هاد الكوفية وكيشطحو وكاين اللي فيهم كان ضد “موازين” بسباب غزة ولكن فالصويرة كان مع النشاط والشطيح 

إقرأ الخبر من مصدره