كود كازا ///
كلشي كيهدر علي اعتقال بودريقة محمد عضو مجلس النواب ورئيس الرجاء البيضاوي فالمانيا. دابا ما كاين حتى اعتقال. تقال بللي كاينة مذكرة اعتقال وولات دولية ضدو. اللي كاين هو قاضي التحقيق فالمحكمة الزجرية طلب يستامع ليه ومادام على برا هادي مدة ما جاش. راه يستحيل دولة المانيا تعتاقل شي مواطن مغربي بناء مذكرة بحال هاد النوع. راها قضية ديال بودريقة بسيطة لا ترقى الي الجرائم المصنفة عالميا خطيرة كالارهاب والبيدوفيليا والتهريب والاغتصاب. هادو وشوف تشوف واش شي دولة اوربية تسلمك شي حد عندها.
دابا كاينة رواية باللي بودريقة باش دخل لالمانيا كانت شكوك على باسبور الخدمة اللي عندو كبرلماني. واحد جايهم من الشرق الاوسط فرحلة مباشرة لالمانيا يعني ساكن فيها٬ طبيعي البوليسي الالماني يشك ويتحقق.
من بعد هاد القضية وبعد البحث على اسم بودريقة باش باللي اسمو كاين فشي قضية معروضة فاسبانيا. يعني كانت شي مذكرة علي المستوى الاوربي تجبد فيها. هنا اش كيديرو فاوربا؟ الامن كيحليها علي القضاء واللي خاصو يحسم بسرعة وديما كيقدم قرينة البراءة ويطلق سراح المعني بالامر. لانو٬ فحالة بوريقة٬ يقدر يطعن فالقضاء الالماني عن طريق محاميه٬ ويمشي للمحكمة الاوربية.
راه فاسبانيا دارو سياسيين كاطالان العصيان ودارو استفتاء للاستقلال وباش توقفو فدول بحال المانيا وبلجيكا وفرانسا وسويسرا٬ طلقوهم٬ واخا كاينة مذكرة بحث بعثها القضاء الاسباني.
ما يمكنش نقارنو بين قضية بورديقة وبين زعماء الاحزاب الانفصالية الكاطالانية٬ ولكن غير باش تفهمو باللي فسيادة القانون٬ المتهم بريء وبريء بصاح.
دابا يتوقع يخرج فالساعات القليلة. القضاء اما يطلب منو يبقى او يقول ليه دير اللي بغيتي. تسليمو لاسبانيا مستبعد واخا حتى هي قضاءها ما كيخرجش على السطر
Laisser un commentaire