السكتيوي: ماتش العراق صعيب ومصيرنا بيدينا.. المهم عندنا نساليو المباراة متأهلين ونفرحو المغاربة

كود سبور//

اعتبر طارق السكتيوي مدرب المنتخب الوطني المغربي الأولمبي، أن الماتش ضد العراق غدا الثلاثاء فنيس، برسم الجولة الثالثة من دور مجموعات أولمبياد باريس2024، غايكون صعيب على المنتخبين حيث اللي غايخسر غايتقصا والرابح غايتأهل، وأكد أنهم واجدين المصير ديالهم بين يديهم والمهم هو ملي يصفر الحكم يتأهلو.

وقال طارق السكتيوي فتصريح للموقع الرسمي للجامعة الملكية المغربية لكرة القدم: “بكل بساطة الماتش ضد العراق ماتش مصيري، بالنسبة لنا وبالنسبة للمنتخب العراقي، واللي كايهمنا حنا هو يصفر الحكم وحنا رابحين وفرحانين مع الشعب المغربي لأن الهدف ديالنا هو نفرحوه، وندوزو للدور الجاي ولأدوار أخرى.

ووضح السكتيوي: “الماتش ما غايكونش ساهل بحكم أن المنتخب اللي غايخسر غايتقصا واللي غايربح غايتأهل للدور الجاي، وغاتكون فيه واحد الندية كبيرة وروح عالية، والتفاصيل غايديرو الفرق، وحنا خاصنا نكونو خدينا الدروس من الماتش اللي فات واللي كانت إيجابية بغض النظر على الأشياء السلبية اللي كانت فيه، وفالحقيقة درنا ماتش كبير خصوصا فالشوط الثاني وكان علينا نماركيو ماشي هدف ولا جوج ولا ثلاثة وتماركا علينا هدف قاتل فالدقائق الأخيرة واكيد غايكون درس لنا فالماتش الجاي اللي الهدف ديالنا فيه وبصراحة هو الرباح وناخدو 3 نقاط”.

وكمل السكتيوي: “الاستعداد لمواجهة العراق بدات من أننا ننساو خسارة الماتش مع أوكرانيا وناخدو منو العبر وهذا الشي اللي كان ابتداء من البارح الاحد، واخا فالحقيقة كانت واحد الحسرة كبيرة على بعثة المنتخب المغربي من بعد الخسارة، وكان علينا نحيدو من الجانب الدهني الأشياء السلبية ونبداو صفحة جديدة بعزيمة قوية ورأس مرفوع، ولأنه مازال ماتش وكلشي بيدينا وخاصنا نربحو باش نتأهلو، وخدمنا على الفريشور فيزيك، وبالنسبة للناحية التكتيكية والتقنية فالمنتخب الخصم كايلعب اللعب المباشر وكايقلب على الالتحامات البدنية وغانحاولو من هنا لغدا نتحكمو فنقاط القوة ديالهم وما ننساوش نلعبو على نقاط القوة ديالنا ونركزو عليها باش نربحو 3 نقاط”.

إقرأ الخبر من مصدره